Presidenti i vendit Ilir Meta, ka reaguar pas vendimit të Kuvendit për të shtyrë votimin për të ashtuquajturën ‘Paketë Antishpifje’, deri në pritjen e opinionit të Komisionit të Venecias.
Meta e ka quajtur këtë vendim si një hap pozitiv dhe si një reflektim që i shërben një qëllimi më të madh të përbashkët.
“Hap shumë pozitiv që e përshëndes se reflektimi i cili i shërben në cdo rast qëllimit më të madh të përbashkët. Eshtë pikërisht mbrojtja e të drejtave kushtetuese të qytetarëve shqiptarë dhe garantimi i standardeve demokratike. Nuk është humbje për askënd përkundrazi aq më tepër dihen shqetësimet mjaft serioze të ndërkombëtareve dhe ky është një moment pozitv”- tha Meta.
Në rendin e ditës së seancës së sotme parlamentare, ishte parashikuar votimi për dekretin e Presidentit Meta, që riktheu në Kuvend dy projektligjet për median.
Por pas propozimit të kreut të grupit parlamentar të PS-së, Taulant Balla, u vendos që votimi të shtyhej deri pas marrjes së opinionit të Komisionit të Venecias.
