Shefi i bankës zviceriane ‘Credit Suisse’, Tidjane Thiam, është dorëhequr për të mbrojtur reputacionin e bankës pas një skandali spiunimi, thuhet në një njoftim zyrtar.
Thiam u largua pas përplasjeve për pushtet me kreun e bordit, Urs Rohner.
Sipas raporteve, dy ish-punonjës ishin vënë nën mbikëqyrje, megjithëse Thiam mohoi të kishte dijeni për operacionet.
Duke folur për radion zvicerane, Rohner tha se largimi i Thiam ishte në funksion të ruajtjes së besueshmërisë së bankës ndërsa mohoi se kishte përplasje me të.
Skandali i mbikëqyrjes filloi të dalë në dritë në shtator kur një hetim gjeti ish-shefin kryesor të veprimtarisë së bankës, Pierre-Olivier Bouée, që kishte punësuar detektivë privatë për të gjurmuar ish-shefin e bankës për menaxhimin e pasurisë, Iqbal Khan.
‘Credit Suisse’ më vonë pranoi se ish-kreu i burimeve njerëzore, Peter Goerke, gjithashtu ishte mbikëqyrur, duke shkaktuar një hetim nga institucioni financiar zviceran, FINMA.
