Ish-kryeministri i Kosovës, Ramush Haradinaj ka reaguar pas vendimit të pasardhësit të tij Albin Kurti, për të ulur pagat e kabinetit qeveritar.
Këtë Haradinaj e ka konsideruar si një narrativë mashtruese, vendim politik dhe të pakuptueshëm pasi për pagat ende nuk ka patur një vendim nga ana e Gjykatës Kushtetuese dhe se të gjithëve do u dalin pagat njëlloj sikurse i kishin.
“Narrativa mashtruese e sjellë nga rruga, po vazhdon tani në institucione, duke u manifestuar përmes veprimeve populliste të panevojshme, që në realitet nuk sjellin asnjë ndryshim efektiv.
I tillë është edhe vendimi për pagat, i cili i subordinohet në plotni Ligjit për Pagat e Sektorit Publik, tashmë të votuar nga Parlamenti i Kosovës, dhe i cili aktualisht gjendet për shqyrtim në Gjykatën Kushtetuese të Republikës së Kosovës.
Ulja e pagave të Kabinetit të sotëm është veprim politik tërësisht i pakuptimtë kur dihet tanimë që brenda pak ditëve pritet aktgjykimi përfundimtar i Gjykatës Kushtetuese rreth Ligjit që rregullon jo vetëm pagat e këtij kabineti, por edhe atyre të ardhshëmëve, dhe se pagat edhe për këtë muaj do u dalin të gjithëve ashtu siç ishin. Mashtrimi ordiner me këtë veprim të sotëm, bëhet për tituj portalesh që të fitojnë ca poena të shpejtë politik, në kurriz të parimit themelor kushtetues të vendit.”- thotë Haradinaj.
Sipas ish-kryeministrit, në javën e parë të qeverisjes Albin Kurti ka vendosur një standard të ri dhe të rrezikshëm të mos respektimit të Gjykatës Kushtetuese.
“Kështu, brenda vetëm një javë qeverisëse, u vendos një standard i ri i rrezikshëm dhe jodemokratik i mosrespektimit të Gjykatës Kushtetuese si autoritet përfundimtar i përcaktimit të përputhshmërisë së ligjeve me Kushtetutën.
Qeveria normale do pezullonte të gjitha veprimet (përfshi edhe ato politike) rreth temës, dhe do priste me respekt deri në vendimin përfundimtar të Gjykatës Kushtetuese.”- përfundon Haradinaj.
