Ditën e sotme, operacioni Forca e Ligjit ka vënë në shënjestër 2 persona të tjerë të krimit, të cilëve u ka kërkuar deklarimin e pasurisë brenda 48 orëve.
Ata janë Pajtim Serianin, i cili konsiderohet si miku i Emiljano Shullazit si dhe Orges Jahelezi, që akuzohet për trafikim narkotikësh.
Jahelezi konsiderohet si pjesë e grupit të Shijakut, i arrestuar gjatë operacionit “Volvo 4” dhe më pas i liruar nga gjykata. Ndërsa miku i Shullazit, Serjani akuzohet për shtrëngim me anë të kanosjes për dhënie të pasurisë.
Pajtim Serjanin u shpall fajtor dhe u dënua me 7 vjet burg, për gjobvënie ndaj biznesmenit të kafes Julian Bregu para 4 vitesh, së bashku me disa të tjerë.
NJOFTIMI I OFL-SË
Operacioni Forca e Ligjit vijon me intensitet punën për përmbushjen e detyrave të përcaktuara në Aktin Normativ nr. 1 të datës 31.01.2020., për dërgimin e kërkesave për vetëdeklarim të pasurisë, si dhe për sekuestrimin e pasurisë në kushtet e emergjencës.
Në këtë kuadër, OFL u ka dërguar kërkesat për vetëdeklarim të pasurisë shtetasve:
– O. J., banues në Tiranë, i dënuar nga Gjykata e Shkallës së Parë për Krimet e Rënda Tiranë, për veprën penale “Trafikim i narkotikëve, në bashkëpunim”;
– P. S., banues në Tiranë, pasi Gjykata e Rrethit Gjyqësor Tiranë e ka dënuar për veprën penale “Shtrëngimi me anë të kanosjes ose dhunës për dhënien e pasurisë”;
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së.
Më pas, përgjigjet e marra do t’i dërgohen SPAK-ut, për veprime të mëtejshme.
Po në përmbushje të detyrave të përcaktuara në Aktin Normativ, OFL vijon veprimet e pandërprera, në bashkëpunim të ngushtë me Drejtoritë Vendore të Policisë në qarqe, duke kryer veprimeve komplekse, për të evidentuar dhe dërguar në SPAK të gjithë personat që janë subjekt i Ligjit Special.
Për të gjitha nismat procedurale dhe operacionet ekzekutive që do të kryejë, OFL do të informojë publikun në vijimësi.
