Arkeologët që punojnë në Luginën e Mbretërve të Egjiptit, kanë pohuar se mund të kenë zbuluar varrin e fshehtë të mbretëreshës Nefertiti, të fshehur në një hapësirë të panjohur më parë përtej dhomës së varrit të Tutankhamunit.
Nëse vërtetohet, ky mund të shënojë një nga zbulimet më të mëdha arkeologjike në historinë e vendit afrikan.
Ekipi, i udhëhequr nga ish-ministri egjiptian i Antikave, Mamdouh Eldamaty, përdori radarin që depërtoi në tokë dhe gjeti një korridor sekret pranë varrit të një prej mbretërve më të famshëm të Egjiptit, faraonit Tutankhamun. Vendi i varrimit të faraonit, u zbulua në vitin 1922 nga arkeologu anglez, Howard Carter.
Studime të ngjashme depërtuese në tokë u kryen te varri në vitin 2017, por nuk u gjet asnjë dhomë e fshehur. Sidoqoftë, Eldamaty dhe ekipi i tij vazhduan punën dhe gjetën një dhomë të madhe të fshehur, në të njëjtën thellësi me dhomën e Tutankhamunit.
