Uashingtoni dhe talibanët kanë nënshkruar një marrëveshje që parasheh kushtet për tërheqjen e trupave amerikane dhe të NATO-s nga Afganistani.
Marrëveshja u nënshkrua nga i dërguari i paqes për Afganistanin, Zalmay Khalilzad dhe një nga udhëheqësit e vjetër të talibanëve, Mullah Abdul Ghani Baradar, në kryeqytetin e Katarit, Doha.
Marrëveshja përcakton që Uashingtoni dhe aleatët e tij të tërheqin trupat e tyre nga pesë baza në Afganistan brenda 135 ditëve të ardhshme. Ushtarët e mbetur amerikanë do të largohen nga vendi në 14 muajt e tjerë, nëse talibanët përmbushin angazhimet e tyre.
Dokumenti paraqet bazat për negociatat e ardhshme midis talibanëve dhe qeverisë afgane, që synojnë të sjellin një paqe të qëndrueshme në vend.
Shtetet e Bashkuara kanë rënë dakord të lehtësojnë bisedimet dhe të heqin sanksionet ndaj talibanëve deri në gusht, me kusht që negociatat të fillojnë ashtu siç është planifikuar.
Udhëheqësi i talibanëve, Hibatullah Akhundzada, u bëri thirrje të gjithë luftëtarëve të tij që të nderojnë dhe t’i përmbahen marrëveshjes.
