Ashtu siç kishte paralajmëuar ditën e djeshme, ministrja e Arsimit, Besa Shahini, iu ka vënë në dispozicion maturantëve linqet e dy librave të maturës që të mund të studiojnë gjatë periudhës dy-javore për provimet.
Bëhet fjalë për dy librat e matematikës dhe gjuhës shqipe, të cilët sipas ministres, i ndihmojnë maturantët për t’u familjarizuar me natyrën e testeve.
“Gjatë periudhës së ndërprerjes së procesit mësimor, punoni me librat e Maturës Shtetërore, që janë përmbledhje e testeve dhe skemave të vlerësimit për gjuhën e huaj, matematikën dhe lëndët me zgjedhje për vitet 2011-2019.
Këta libra ju vijnë në ndihmë për t’u familjarizuar me natyrën e testeve dhe të pyetjeve që përdoren në këto teste.”– shkruan ministrja Shahini.
Mësimi në shkolla është vendosur të ndërpritet deri në datën 23 mars, për shkak të frikës së përhapjes së koronavirusit në vend. Më tej do të shikohet si do të vijojë situata.
Ministrja Shahini tha se gjatë kësaj periudhe, mësuesit do i orientojnë nxënësit që të mësojnë nga shtëpia me anë të telefonave. Mësuesit mund të përgatisin mësimin me anë videosh e të shpërndahen në rrjetet sociale duke përdorur klasat virtuale.
