Kreu i Shtetit Ilir Meta ka përshëndetur planin ekonomik të Kryeministrit Rama për zbutjen e efekteve të koronavirusit.
Meta gjithashtu ka pranuar edhe përgjysmimin e pagës së propozuar nga Rama për veten e tij ashtu si edhe për ministrat dhe deputetët.
Presidenti më tej ka kërkuar nga qeveria të përcaktojë sa më parë kriteret e ndihmës për biznesin dhe familjet në nevojë.
“Përshëndes mbështetjen financiare të bërë publike nga Kryeministri.
Ftoj Qeverinë të përcaktojë sa më parë kriteret e ndihmës për biznesin dhe familjet më në nevojë.
Inkurajoj gjithashtu konsultimin me grupet e interesit për të bërë transparente detajimin e fondeve, për t’u dhënë përgjigje të menjëhershme nevojave emergjente të qytetarëve.
Sa i përket trajtimit financiar të Presidentit të Republikës, ai do të shkurtohet në të njëjtën mënyrë, si dhe për zyrtarët e lartë të shtetit, të parashikuar në planin e bërë publik.
Po kështu Institucioni i Presidentit të Republikës është solidarizuar me shkurtimin e fondit të buxhetit vjetor në interes të riadresimit të tyre, në mbështetje të shëndetësisë dhe sektorëve të vijës së parë në këtë përballje me pandeminë globale të COVID 19.
Bashkëpunimi, gjithëpërfshirja, humanizmi dhe solidariteti mbarëkombëtar do të na japë të gjithëve fuqinë e duhur pozitive për ta fituar këtë sfidë, duke mundur frikën, me besimin e palëkundur te e ardhmja dhe në Zot”-shkruan Kreu i Shtetit.
