Një prej të infektuarve me koronavirus në qytetin e Fierit, është djali i deputetes socialiste Antoneta Dhima.
Këtë e ka bërë me dije vetë deputetja, e cila thotë se nuk e di se si i biri është infektuar. Ndaj ajo u bën thirrje të gjithë qytetarëve që të kujdesen për veten, ndërsa falenderon dhe bluzat e bardha për punën e tyre.
“Pas publikimit të një informacioni të dhënë miqësisht, më lind e drejta që në këtë situatë jo shumë të këndëshme të ndalem edhe unë me pak fjalë.
Si qytetarë që punojmë e jetojmë në këtë vend, nuk jemi të përjashtuar nga asgjë, aq më tepër nga semundjet dhe “armiqtë e padukshëm”.
Është e vërtetë që im bir ka rezultuar pozitiv ndaj testit të COVID-19, dhe tashmë ndodhet në mjediset e Spitalit Infektiv nën kujdesin e mjekëve dhe infermierëve pas disa ditëve karantinë në shtëpi.
E ndodhur përballë këtij fakti, si nënë, kam bërë gjthcka munda për të evitur kontaktet e tim biri me persona të tjerë, ndërsa u pa e arsyeshme që ai të qëndronte nën kujdesin e mjekëve dhe infermierëve.
Besimplotë se falë punës dhe përkushtimit të mjekëve dhe infermierëve, gjithcka do të shkoj siç duhet, doja t’ju thosha të gjithëve që të tregoheni të kujdessshëm, të zbatoni rregullat dhe respektoni vendimet e marra.
Edhe pse ende nuk e di se si im bir është prekur nga ky virus, këshilla ime si nënë është të ruani veten, pasi vetëm kështu mund ta fitojmë këtë luftë, të ashpër por jo të pamundur!”-, shkruan deputetja.
Pas Tiranës e cila deri tani mban rekordin në vend me numrin me të lartë të të infektuarve qëndron Fieri, me plot 12 raste të konfirmuara.
