Presidenti Meta ka reaguar ka bërë thirrje që situata e qytetarëve shqiptarë të bllokuar në pikat kufitare të Kapshticës e Kakavijës të marrë zgjidhje menjëherë.
Kreu i shtetit u bën thirrje qytetarëve që të respektojnë rregullat si dhe qeverisë të respektojë kërkesat e gjendjes së fatkeqësisë natyrore por edhe detyrimet kushtetuese që ka ndaj qytetarëve të vet.
‘Jam shumë i shqetësuar mbi situatën e qytetarëve shqiptarë të cilët vijojnë ende të bllokuar në pikat e kalimit kufitar të Kakavijës dhe Kapshticës. Kjo situatë duhet të marrë zgjidhje të menjëhershme.
U bëj thirrje sërish të gjithë qytetarëve shqiptarë të respektojnë kushtet e urgjencës dhe domosdoshmërisë të imponuara nga pandemia e COVID-19 në pikat tona kufitare e njëkohësisht kërkoj nga autoritetet tona përgjegjëse të respektojnë, jo vetëm kërkesat e situatës së gjendjes së fatkeqësisë natyrore, por edhe detyrimet kushtetuese dhe ndërkombëtare që shteti ka ndaj qytetarëve të vet në një situatë të tillë.
Edhe njëherë kërkoj nga të gjithë më shumë bashkëpunim e mirëkuptim, solidaritet e përgjegjësi mes qytetarëve dhe autoriteteve tona në dobi të interesit publik dhe sigurisë së jetës.’ – shkruan Meta në Facebook.
