Biznesmeni shqiptar Martin Shkreli, i cili shpesh në media etiketohet si “shqiptari më i urryer në SHBA”, ka kërkuar të nxirret përkohësisht nga burgu me argumentin se do të gjejë një trajtim për koronavirusin.
Siç shkruan revista Forbes, në një letër 11-faqesh të postuar në faqen e internetit të Prospero Pharmaceuticals, një kompani që Shkreli e ka bashkë-themeluar në maj të vitit 2015, sipërmarrësi në burg rendit tetë ilaçe ekzistuese që mund të përdoren për të trajtuar COVID-19.
Shkreli tha se përpjekjet e tanishme të industrisë farmaceutike nuk po shkojnë aq larg, duke thënë se ai është në një pozitë unike për të ndihmuar si “një pak drejtues me përvojë në të gjitha aspektet e zhvillimit të ilaçeve”.
“Unë po kërkoj (3 muaj) për të ndihmuar në punën kërkimore mbi COVID-19. Lirimi në botën e pas-COVID nuk është ngushëllim as për të burgosurit. Si një sipërmarrës i suksesshëm i biofarmës, pasi ka blerë kompani të shumta, nga krijimi i molekulave dhe gjenerimi i hipotezave, deri te vlerësimet preklinike dhe modeli i provës klinike, sinteza dhe vendosja e ilaçeve, unë jam një nga të paktët drejtues me përvojë në të gjitha aspektet e zhvillimit të ilaçeve”, shkroi Shkreli.
Shkreli fitoi famë në vitin 2015 pas raportimeve se ai rriti çmimin e ilaçeve të kompanisë së tij farmaceutike me 4,000%. Ai u arrestua përfundimisht në fund të vitit 2015 për mashtrim të letrave me vlerë dhe u dënua me shtatë vjet burg.
