Shkon në 433 numri i të infektuarve nga koronavirusi në vend, me 17 raste të reja të regjistruara në 24 orët e fundit.
Siç bëri me dije Ministria e Shëndetësisë, rastet e reja janë në Tiranë, Shkodër, Pukë, Lushnjë, Krujë dhe Durrës, e harta nuk është zgjeruar me qytete të reja të prekura nga koronavirusi.
Siç ilustrohet edhe në hartën e mëposhtme, rastet e reja janë në Tiranë (10), Shkodër (3), Pukë (1), Lushnjë (1), Krujë (1) dhe Durrës (1), por nuk ka përhapje në qytete të tjera.
Kurba e rritjes së pandemisë është në rënie, por megjithatë sot ka më shumë raste se sa në dy ditët e mëparshme. Dje pati vetëm 7 raste të reja, e të enjten 9.
Ministria e Shëndetësisë thotë se 15 pacientë të tjerë i janë shtuar listës së të shëruarve në 24 orët e fundit, duke e çuar numrin total të të shëruarve në 197.
Zv.ministrja Mira Rakacolli tha se në dy spitalet COVID aktualisht po marrin shërbim 60 pacientë. 6 prej pacientëve janë të intubuar.
TË DHËNAT:
Në vijim të komunikimit të përditshëm, Ju bëjmë me dije se vazhdon puna në terren për identifikimin e rasteve të reja dhe gjurmimin e kontakteve të rasteve, të konfirmuara pozitive.
Në 24 orët e fundit janë testuar 259 persona të dyshuar, prej të cilëve janë konfirmuar 17 raste të reja me COVID-19.
Deri në këto momente janë testuar 3644 raste të dyshuara dhe prej tyre janë të konfirmuar pozitivë me COVID-19, 433 raste.
Betejën me këtë sëmundje e kanë humbur deri tani 23 qytetarë, megjithë përpjekjet e jashtëzakonshme të personelit shëndetësor.
Gjatë 24 orëve të fundit, 15 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 197.
Ju informojmë se, në shërbimin infektiv aktualisht janë 53 të shtruar. 6 prej tyre janë në terapi intensive, ndërsa 2 pacientë janë të intubuar.
Në spitalin COVID 2 “Shefqet Ndroqi”, janë 7 pacientë të shtruar. 5 pacientë janë në terapi intensive, prej tyre 4 pacientë janë të intubuar.
Në dy spitalet COVID aktualisht po marrin shërbim 60 pacientë.
Harta e të prekurve nga COVID-19 zgjerohet në Tiranë me 10 raste, Shkodër 3 raste, Pukë 1 rast, Lushnje 1 rast, Krujë 1 rast dhe Durrës 1 rast
Shpërndarja gjeografike e rasteve pozitive, është si vijon:
– Tiranë 209 raste
– Durrës 39 raste
– Lushnje 6 raste
– Elbasan 15 raste
– Fier 32 raste
– Kavajë 8 raste
– Rrogozhinë 4 raste
– Korçë 17 raste
– Vlorë 5 raste
– Shkodër 52 raste
– Lezhë 14 raste
– Berat 2 rast
– Has 12 raste
– Krujë 6 raste
-Tropojë 4 raste
– Pukë 5 raste
– Mirditë 3 raste
Ministria e Shëndetësisë dhe Mbrojtjes Sociale i kërkon qytetarëve të vijojnë të respektojnë masat e distancimit social. Është e rëndësishme që masat e kontrollit të infeksionit të respektohen maksimalisht edhe brenda rretheve familjare duke shmangur vizitat tek të afërmit për çdo lloj arsye, për të parandaluar transmetimin e COVID-19.
Nëse keni shenja të sëmundjes COVID19 telefononi numrin e urgjencës 127. Për çdo pyetje apo informacion rreth COVID19 telefononi në linjën e gjelbër 0800 40 40./Hashtag.al
