21 raste të reja me koronavirus janë regjistruar në 24 orët e fundit, duke e çuar në 467 raste numrin në total të të infektuarve në vend.
Mes rasteve të reja bën pjesë dhe një punonjës i personelit mjekësor dhe 2 fëmijë.
Siç shihet edhe në hartën e ilustruar më poshtë, rastet e reja janë në Tiranë (6 raste), Shkodër (13), Durrës (1) dhe Has (1 rast).
Nëse ditët e shkuara kishim një ulje të numrit të rasteve ditore, duket se kurba e pandemisë sot pëson një rritje.
Sipas Ministrisë së Shëndetësisë, rastet e identifikuara në 24 orët e fundit janë kontakte të rasteve të mëparshme të prekura me COVID-19.
Që nga fillimi i marsit kur u identifikuan dy rastet e para me koronavirus deri më sot, janë kryer gjithsej 4070 testime, sipas të dhënave të publikuara nga Ministria e Shëndetësisë.
Nga këta, betejën me koronavirusin e kanë humbur deri tani 23 qytetarë.
