Ambasadorja amerikane në Tiranë Yuri Kim si edhe Ambasadori i BE-së, Luigi Soreca janë shprehur mirënjohës ndaj vendimit nga pala shqiptare për të dërguar edhe 60 infermierë ditën e sotme në Itali për të ndihmuar në luftën ndaj koronavirusin.
Nga ana e saj Yuri Kim duke falënderuar Shqipërinë ka thënë se kjo është NATO dhe si vend anëtar i saj edhe Shqipëria e tregoi veten në raport me aleancën.
“Si shtet anëtar i NATO-s në betejën e përbashkët nga COVID-19, një falenderim special Shqipërisë për dërgimin e infermierëve në Itali! Ne jemi NATO“-shkruan ambasadorja në Twitter.
Ndërsa Soreca e lidhi gjestin shqiptar me solidaritetin evropian dhe vlerave që unioni ku kërkon të aderojë Shqipëria ka në zemër të vlerave të saj.
“Një tjetër gjest i shkëlqyer solidariteti nga Shqipëria. Sot 60 infermierë shqiptarë fluturuan në Itali për të dhënë kontributin e tyre në luftën kundër COVID19. Solidariteti është në zemër të vlerave të BE”-shkruan Soreca.
