Në aplikacionin e-albania tani mund të aplikohet edhe për leje dalje për arsye shëndetësore.
Kryeministri Edi Rama sqaron procedurën e aplikimit në një shënim në Facebook, ku thotë se qytetarin mund ta shoqërojë vetëm një person dhe se autorizimi vlen vetëm për rrugën shtëpi-qendër shëndetësore-shtëpi.
Rama thotë se personi duhet të ketë me vete edhe një dokument mjekësor për vizitën.
“Nga sot në www.e-albania.al edhe leje – daljet për arsye shëndetësore. Kujdes! qytetari duhet të ketë me vete një dokument mjekësor për vizitën! Qytetarin mund ta shoqërojë vetëm një person tjetër!
Autorizimi vlen vetëm për rrugën shtëpi-qendër shëndetësore-shtëpi. Ndiqni procedurën e thjeshtë në e-albania.”– shkruan Rama.
Procedura e aplikimit:
Aplikimi do të kryhet përmes shërbimit ONLINE “Leje per dalje“ për arsye shëndetësore, në e-Albania
– Identifikohuni në portalin e-Albania përmes llogarisë tuaj
-Klikoni shërbimin “Leje për Dalje”
-Zgjidhni opsionin “Leje për arsye shëndetësore”;
-Shkruani saktë daten, orën e lëvizjes dhe itinerarin me destinacionin përkatës.
Në rastet kur lëvizja për arsye shëndetësore do të bëhet me automjet:
-Nëse mjeti është në pronësinë tuaj, do t’ju shfaqet direkt në listë. Nëse jo, ju mund të shtoni manualisht të dhënat e mjetit: Targën dhe numrin e shasisë së tij.
-Dhe shtypni “Dërgo” për të përfunduar aplikimin
-Miratimi do të dërgohet në adresën e-mail dhe në numrin e telefonit të regjistruar në portal.
Rama thotë se kërkesa për leje për arsye shëndetësore bëhet vetëm në portalin e-Albania. Ata, që lëvizin pa lejen nga e-Albania dhe nuk zotërojnë dokument mjekësor për të justifikuar leje-daljen për arsye shëndetësore, kryejnë një shkelje që ndëshkohet në bazë të Aktit Normativ dhe masave të reja në Kodin Penal.
