Koalicioni opozitar ka dalë me një deklaratë të përbashkët pas takimit urgjent të ditës së sotme. në deklaratë theksohet se në ditët e vështira që po kalon vendi, shteti duhet të jetë pa asnjë vonesë në krah e funksion të shëndetit e mirëqenies së qytetarëve.
Në reagimin e opozitës theksohet se qeveria ka bërë shumë pak teste të Covid-19, ka lënë jashtë ndihmës financiare mbi 750 mijë qytetarë dhe nuk ka akoarduar fonde të mjaftueshme për përballimin e krizës.
“Në këto ditë të vështira për çdo shqiptar dhe në kushtet e një krizë të paprecedentë shëndetësore dhe ekonomike, shteti duhet të jetë pa asnjë vonesë dhe asnjë mëdyshje në krah dhe në funksion të shëndetit dhe të mirëqënies së njerëzve kudo ku ata ndodhen. Me shqetësimin më të madh për sigurinë, shëndetin dhe mirëqenien e qytetarëve shqiptarë, për ne është e papranueshme që 6 javë pas shpërthimit të epidemisë, qeveria:
- Ka bërë mesatarisht vetëm 110 teste në ditë, për mbi 2,6 milionë banorë.
- Ka lënë jashtë ndihmës financiare mbi 750 mijë qytetarë dhe nuk ka shpërndarë ndihmën e premtuar për mijëra të tjerë.
- Nuk ka akorduar fonde të mjaftueshme për përballimin e krizës, duke e renditur Shqipërinë të fundit në rajon.” – thuhet në reagim.
Në reagimin e mëtejshëm të koalicionit opozitar theksohet gjitashtu se qeveria është treguar e paaftë dhe ka dështuar në menaxhimin e krizës së krijuar nga Covid-19.
Sipas opozitës, prioriteti i qeverisë deri më sot kanë qenë gjobat e kërcënimi me burg ndaj qytetarëve në vend të testimit, bashkëpunimit e ndihmës së tyre.
“Koalicioni opozitar vlerëson se qeveria është treguar e paaftë dhe ka dështuar për të menaxhuar në mënyrën e duhur situatën e krijuar nga koronavirusi. Të gjitha faktet tregojnë se qeveria po improvizon dhe se nuk ka asnjë strategji për daljen nga kriza. Regjimi i Facebook-it ka suprimuar çdo vendimmarrje përmes institucioneve. Gjatë 6 javëve, qeveria kërkoi sakrifica vetëm nga qytetarët, por nuk ka marrë asnjë përgjegjësi për vete. Lufta e qeverisë duhet të jetë me virusin dhe pasojat e tij dhe jo me qytetarët. Por deri më sot prioritet i qeverisë ka qenë gjobitja e qytetarëve dhe jo testimi, kufizimi kaotik i lëvizjes dhe jo transparenca, kërcënimi me burg dhe jo bashkëpunimi, braktisja e njerëzve në nevojë dhe jo ndihma për ta.” – vijon reagimi.
Opozita vëren gjithashtu se edhe 6 javë pas emergjencës në vend ka shumë të infektuar ndërsa u tregua se prioritet për kryeministrin janë një grusht klientësh me të cilët grabit taksat e qytetarëve.
Opozita i bën thirrje qeverisë që të rishikojë paketat gjysmake ekonomike si dhe të bëjë transparencë lidhur me çdo qindarkë të shpenzuar. Në deklaratë i bëhet thirrje prokurorisë që të hetojë rastet e korrupsionit të bëra publike gjatë emergjencës.
“6 javë pas nisjes së emergjencës, numri zyrtar i të infektuarve të sotëm mbetet i lartë si në ditët e para të pandemisë. Qeveria refuzoi mbylljen e fasonerive dhe bizneseve të tjera me risk të lartë infektimi dhe i ktheu ato në vatra përhapje, siç vërtetojnë rastet në Krujë, Kurbin, Kamëz dhe Shkodër. Kjo krizë e rëndë konfirmoi se për kryeministrin prioritet janë një grusht klientësh, me të cilët grabit taksat e shqiptarëve. Në vend që të financojë ekonominë për të mos mbyllur vendet e punës, Edi Rama zgjedh të vazhdojë pagesat prej mbi 100 milonë euro për disa koncesione korruptive. Koalicioni opozitar bën thirrje për rishikimin urgjent të paketave gjysmake ekonomike, në mënyrë që askush që është prekur nga kriza, të mos përjashtohet nga ndihma si dhe për anullimin e menjëhershëm të koncesioneve. Koalicioni opozitar kërkon transparencë për çdo qindarkë të shpenzuar për përballimin e krizës dhe kërkon hetimin urgjent të rasteve të korrupsionit të bëra publike. I bëjmë thirrje qeverisë të bëjë publike kontratat e klasifikuara sekret, dhe i kërkojmë Prokurorisë të nisë hetimin urgjent të rasteve të korrupsionit të bëra publike gjatë emergjencës. Qytetarët shqiptarë kanë të drejtë të dinë sesi po shpenzohen paratë e taksave të tyre për të cilat kanë aq nevojë sot’, thuhet në deklaratën e koalicionit opozitar pas tryezës së sotme në selinë e PD.” – mbyllet reagimi.
