Kina ka konfiskuar mbi 89 milion maska me cilësi të dobët, pasi Pekini përballet me një mori ankesash për veshje mbrojtëse të një cilësie të dobët të eksportuara në të gjithë botën.
Kërkesa për pajisje mbrojtëse është rritur ndërsa kombet në të gjithë globin luftojnë koronavirusin vdekjeprurës, i cili ka infektuar gati 2.9 milion njerëz.
Por siç shkruan Channel Asia, një numër vendesh janë ankuar për maska të skaduara dhe produkte të tjera të eksportuara nga Kina, kryesisht për përdorim nga punëtorët mjekësorë dhe grupet e cenueshme.
Që nga e premtja, rregullatorët e tregut të Kinës kishin inspektuar afro 16 milion biznese dhe sekuestruan mbi 89 milion maska dhe 418,000 copë pajisje mbrojtëse, tha Gan Lin, zëvendësdrejtorja e Administratës Shtetërore të Rregullimit të Tregut, në një konferencë për shtyp.
Rregullatorët gjithashtu kishin sekuestruar dezinfektues joefektivë me vlerë mbi 7.6 milion juanë (1.1 milion dollarë), tha Gan Li.
Është e paqartë se sa nga mallrat e konfiskuara ishin destinuar për tregjet jashtë vendit.
Në një përpjekje për të eliminuar produkte me cilësi të dobët, Kina nxori rregulla të reja të shtunën duke thënë se edhe maskat jo-mjekësore duhet të plotësojnë standardet kombëtare dhe ndërkombëtare të cilësisë.
Eksportuesit duhet të paraqesin një deklaratë me shkrim që produktet e tyre mjekësore i plotësojnë kërkesat e sigurisë së vendit të destinacionit, tha Ministria e Tregtisë në një deklaratë.
Vendimi për përforcimin e rregullave vjen pasi disa vende përfshirë Spanjën, Holandën, Republikën Çeke dhe Turqinë u detyruan të kthejnë qindra mijëra maska të skaduara dhe veshje mbrojtëse të importuara nga Kina.
Qeveria kanadeze tha javën e kaluar se rreth një milion maska për fytyrën të blera nga Kina nuk arritën të përmbushnin standardet e duhura për profesionistët e kujdesit shëndetësor.
Zyrtarët shëndetësorë holandezë muajin e kaluar kthyen mbi gjysmë milionë maska kineze – të cilat ishin dërguar në spitale – pas ankesave se ato nuk i mbulonin fytyrën siç duhet, ose kishin filtra të dëmtuar.
Sipas shifrave zyrtare, prodhimi i përditshëm i maskave në Kinë ka kaluar 116 milion. Sipas platformës Tianyancha, në dy muajt e parë të vitit, 8.950 prodhues të rinj filluan të prodhojnë maska në Kinë.
“Pavarësisht masave në mbarë vendin, bizneset po vazhdonin me prodhimin e paligjshëm të pajisjeve mjekësore pasi ishte një mënyrë për të fituar para të shpejta“, tha Jin Hai, një zyrtar kinez i doganave. Ai shtoi se deri nga mesi i prillit ishin konfiskuar në port mbi 31.6 milion maska të dobëta dhe 509,000 veshje mbrojtëse të destinuara për eksport.
