Miliarderi i Microsoft dhe një nga dhuruesit më të mëdhenj të fondeve për Organizatën Botërore të Shëndetit, Bill, Gates, ka thënë se pas pandemisë Covid-19, bota nuk do jetë më e njëjta.
Në një artikull për The Economist, Gates argumenton, se njerëzimi është futur në një fazë e rrjedhë të re të historisë së tij, luftën ndaj pandemive.
Sipas tij, bota nuk do jetë më e njëjta deri në zbulimin e një vaksine kundër Covid-19 që do përfshijë mbarë njerëzimin.
Gates thekson gjithashtu se shkenca do ecë me ritme më të shpejta në prodhimin e një vaksine kundër Covid-19, madje ajo do prodhojë edhe vaksina universale kundër çdo lloj pandemie.
Më poshtë është shkrimi i plotë i tij për The Economist.
Kur historianët të shkruajnë librin lidhur me pandeminë Covid-19, ajo që kemi jetuar deri më tani do të marrë ndoshta vetëm një të tretën e tij. Pjesa më e madhe e tregimit do të jetë ajo që ndodh më pas.
Në pjesën më të madhe të Evropës, Azisë Lindore dhe Amerikës së Veriut, piku i pandemisë do të ketë kaluar deri në fund të këtij muaji.
Pas disa javësh, shumë shpresojnë se gjërat do të kthehen në mënyrën si ishin para saj në dhjetor. Fatkeqësisht, kjo nuk do të ndodhë.
Unë besoj se njerëzimi do ta mundë këtë pandemi, por vetëm kur shumica e popullsisë të vaksinohet.
Deri atëherë, jeta nuk do të kthehet në normalitet. Edhe nëse qeveritë heqin urdhrat për kufizimin dhe bizneset rihapin dyert e tyre, njerëzit kanë një neveri natyrale për ta ekspozuar veten ndaj sëmundjeve.
Aeroportet nuk do të kenë turma të mëdha. Sportet do të luhen në stadiume boshe. Dhe ekonomia botërore do të jetë në depresion, sepse kërkesa do të mbetet e ulët dhe njerëzit do të shpenzojnë më shumë në mënyrë konservative.
Ndërsa pandemia ngadalësohet në vendet e zhvilluara, ajo do të përshpejtohet në vendet në zhvillim. Përvoja e tyre, megjithatë, do të jetë më e keq.e Në vendet më të varfra, ku më pak punë mund të bëhen nga distanca, masat distancuese nuk do të funksionojnë.
Virusi do të përhapet shpejt, dhe sistemet shëndetësore nuk do të jenë në gjendje të kujdesen për të infektuarit. Covid-19 mposhti qytete si Neë York, por të dhënat sugjerojnë që edhe një spital i vetëm në Manhattan ka shtretër të kujdesit intensiv sa shumica e vendeve afrikane. Miliona mund të vdesin.
Kombet e pasura mund të ndihmojnë, për shembull, duke u siguruar që furnizimet thelbësore nuk shkojnë vetëm te ofertuesi më i lartë. Por njerëzit në vendet e pasura dhe të varfëra njësoj do të jenë të sigurt, vetëm pasi të kemi një zgjidhje efektive mjekësore për këtë virus, që do të thotë një vaksinë.
Gjatë vitit të ardhshëm, studiuesit mjekësorë do të jenë ndër njerëzit më të rëndësishëm në botë. Për fat të mirë, edhe para kësaj pandemie, ata po bënin hapa gjigantë në vaksinologji.
Vaksinat konvencionale mësojnë trupin tuaj të njohë formën e një patogjeni, zakonisht duke futur një formë të vdekur ose të dobësuar të virusit. Por ekziston gjithashtu një lloj i ri imunizimi që nuk kërkon nga studiuesit të kalojnë kohë duke rritur vëllime të mëdha të patogjenëve.
Këto vaksina përdorin kodin gjenetik për t’u dhënë udhëzime qelizave tuaja se si të montojnë një përgjigje imune. Ato ndoshta mund të prodhohen më shpejt se vaksinat tradicionale.
Shpresa ime është që, deri në gjysmën e dytë të vitit 2021, institucionet në të gjithë botën do të prodhojnë një vaksinë. Nëse do të ndodhë kështu, do të jetë një arritje historike: koha më e shpejtë nga njohja e një sëmundjeje të re në imunizimin kundër saj.
Përveç këtij përparimi në vaksinat, dy përparime të tjera të mëdha mjekësore do të dalin nga pandemia.
Njëra do të jetë në fushën e diagnostifikimit. Herën tjetër që një virus i ri do shfaqet, njerëzit ndoshta do të jenë në gjendje ta testojnë atë në shtëpi në të njëjtën mënyrë që ata testojnë shtatzëninë. Në vend që të urinojnë në gotë, ato thjesht do të shkundin hundët. Studiuesit mund të kishin gati një test të tillë brenda disa muajve nga identifikimi i një sëmundjeje të re.
Përparimi i tretë do të jetë në ilaçet antivirale. Këto kanë qenë një degë e nën-investuar e shkencës. Ne nuk kemi qenë aq të efektshëm në zhvillimin e ilaçeve për të luftuar viruset, ashtu siç kemi ato për të luftuar bakteret.
Por kjo do të ndryshojë. Studiuesit do të zhvillojnë studime të mëdha, të ndryshme të antiviraleve, të cilat ata do të jenë në gjendje të skanojnë dhe të gjejnë shpejt trajtime efektive për viruset e reja.
Të tre teknologjitë do të na përgatisin për pandeminë tjetër, duke na lejuar të ndërhyjmë herët, kur numri i rasteve është ende shumë i ulët. Por hulumtimi themelor do të na ndihmojë gjithashtu në luftimin e sëmundjeve infektive ekzistuese, madje do të ndihmojë në avancimin e kurave për kancerin.
(Shkencëtarët kanë menduar gjatë se vaksinat mund të çojnë në një vaksinë të mundshme të kancerit. Deri me shfaqjen e Covid-19, nuk kishte shumë hulumtime se si ato mund të prodhoheshin masivisht me çmime madje disi të përballueshme.)
Përparimi ynë nuk do të jetë vetëm në shkencë. Do të jetë gjithashtu në aftësinë tonë për t’u siguruar që të gjithë përfitojnë nga kjo shkencë. Në vitet pas 2021-shit, unë mendoj se do të mësojmë nga vitet pas 1945-ës.
Me përfundimin e Luftës së Dytë Botërore, liderët ndërtuan institucione ndërkombëtare si Kombet e Bashkuara për të parandaluar më shumë konflikte. Pas Covid-19, udhëheqësit do të përgatisin institucione për të parandaluar pandeminë tjetër.
Këto do të jenë një ndërthurje e organizatave kombëtare, rajonale dhe globale. Unë pres që ata të marrin pjesë në këto “stërvitje” në të njëjtën mënyrë si forcat e armatosura marrin pjesë në stërvitje të përbashkëta.
Këto do të na mbajnë gati për herë tjetër kur një virus i ri hidhet nga lakuriqët ose zogjtë te njerëzit. Ata gjithashtu do të na përgatisin nëse një “aktor” i keq krijon një sëmundje infektive në një laborator dhe do të përpiqet ta përdorë atë si armë. Duke praktikuar një pandemi, bota gjithashtu do të mbrohet kundër një akti të bioterrorizmit.
Shpresoj se kombet e pasura përfshijnë ato më të varfra në këto përgatitje, veçanërisht duke kushtuar më shumë ndihma të huaja për ndërtimin e sistemeve të tyre parësore të kujdesit shëndetësor. Edhe personi më i interesuar – ose qeveria izoluese – duhet të pajtohet me këtë deri tani.
Kjo pandemi ka treguar se viruset nuk respektojnë ligjet e kufijve dhe se ne të gjithë jemi të lidhur biologjikisht nga një rrjet i mikrobeve mikroskopike, pavarësisht nëse na pëlqen apo jo. Nëse një virus i ri shfaqet në një vend të varfër, ne dëshirojmë që mjekët e tij të kenë aftësinë ta zbulojnë atë dhe ta frenojnë atë sa më shpejt të jetë e mundur.
Asnjë nga këto nuk është e pashmangshme. Historia nuk ndjek një kurs të caktuar. Njerëzit zgjedhin se cilin drejtim të marrin, dhe mund të bëjnë kthesën e gabuar. Vitet pas 2021 mund të ngjajnë me vitet pas 1945-ës.
Por analogjia më e mirë për sot mund të jetë 10 nëntori 1942. Britania sapo kishte fituar fitoren e saj të parë të luftës dhe Winston Churchill deklaroi në një fjalim: “Ky nuk është fundi. Nuk është as fillimi i fundit. Por, mbase është fundi i fillimit .”
VINI RE: Ky material është pronësin intektuale e The Economist
