Policia e Shtetit ka publikuar detaje lidhur me ngjarjen e mbrëmshme në Skrapar, ku një person nisi të qëllojë me armë në ajër duke shkaktuar panik te banorët.
Policia ka publikuar një video nga aksioni për arrestimin e të dyshuarit, Hasan Hoxha, i cili është vënë në pranga.
Në fillim u tha se ishin dy vëllezër ata që kanë dalë në dritare duke qëlluar në ajër e mbajtur zgjuar gjithë Skraparin dhe se pas 5 orësh negociime u dorëzuan. Por mesa duket vetëm njëri është vënë në pranga.
DETAJET E POLICISË
Rreth orës 01:00 të datës 29.04.2020, forcat speciale “Renea” kanë vënë në pranga shtetasin H. H., 57 vjeç, banues në lagjen ”5 Shtatori”, Skrapar.
Ky shtetas, në orët e mbrëmjes së djeshme, në katin e parë të një pallati, ka qëlluar në ajër me armë zjarri dhe më pas kur ka parë shërbimet e Policisë ka qëlluar edhe në drejtim të tyre. Më vonë, ky shtetas u fut në banesë dhe nuk iu përgjigj thirrjeve të Policisë për t’u dorëzuar.
Shërbimet e Policisë morën masa sigurie dhe rrethuan pallatin. Në ndihmë të Policisë vendore shkuan shërbimet e Drejtorisë Vendore të Policisë Berat dhe më pas forcat speciale “Renea”.
Pas ndërhyrjes së forcave speciale “Renea” u bë e mundur vënia në pranga e 57-vjeçarit dhe u sekuestrua edhe arma kallashnikov, bashkë me një sasi municioni.
Materialet i kaluan Prokurorisë, për veprime të mëtejshme.
