Ndërkohë që sot pritet vendimi për masën e sigurisë për protestuesit e arrestuar më 17 Maj, Lëvizja Vetëvendosje në Tiranë dhe shoqëria civile po proteston para Gjykatës së Tiranës.
Ata kërkojnë lirimin e të arrestuarve. Mes të arrestuarve është edhe kreu i Vetëvendosjes Tiranë, Boiken Abazi.
Një prej anëtarëve të kësaj partie e cila ndodhet në protestë, znj. Gerarda Demiraj shprehet se ndaj aktivistëve është ushtruar dhunë policore si dhe i ka kërkuar Gjykatës të jetë sy hapur dhe të lirojë protestuesit.
Lëvizja Vetëvendosje ka reaguar përmes një deklarate për mediat, ku e konsideron brutale shembjen e Teatrit dhe për protestuesit thotë se ishin paqësorë.
Vetëvendosje kërkon nga organet e drejtësisë së Republikës së Shqipërisë që të ruajnë integritetin duke mos e vijuar më tej këtë “burgim politik” të protestuesve si dhe të nisin hetimet për “rrënuesit” e Teatrit Kombëtar.
“Edhe sot po vazhdojnë të mbahen të burgosur disa nga protestuesit që kundërshtuan rrënimin e Teatrit Kombëtar nga Qeveria dhe Bashkia në Tiranë, mes tyre dhe Drejtori Ekzekutiv i Qendrës së Lëvizjes VETËVENDOSJE në Shqipëri Boiken Abazi.
Boiken Abazi përveç kontributit të tij si aktivist i rëndësishëm për Lëvizjen VETËVENDOSJE! shquhet edhe si qytetar i kulturuar e intelektual i angazhuar. Ndalimi i tij shpresojmë të mos jetë hakmarrje e ndonjë idhnaku që mban inat për prishjen e pazareve me Vuçiqin. Vuçiqi mund të jetë mik individual i dikujt, por ai nuk mund të jetë kurrë mik i shqiptarëve, për shkak të historisë e politikës që ai përfaqëson.
Ndërtesa e Teatrit ishte vlerë e dashur për qytetarët, shkatërrimi i saj ishte barbari e paqytetëruar. Protestuesit ishin paqësorë, prishja e Teatrit ishte brutale. Ata po mbahen pa arsyetim dhe me urdhër të prerë politik. Përgjegjësit politikë atje duket qartazi se po dëshirojnë ta bllokojnë shprehjen qytetare në formë proteste dhe pjesëmarrjen publike me argumente në kundërshtimin e rrënimit të Teatrit Kombëtar. Mirëpo çdo përpjekje për ta ndaluar protestën qytetare me burgosje është e dëshmuar që vetëm e rrit protestën dhe rezistencën.
Kërkojmë nga organet e drejtësisë së Republikës së Shqipërisë që të ruajnë integritetin duke mos e vijuar më tej këtë burgim politik të protestuesve si dhe të nisin hetimet për rrënuesit e Teatrit Kombëtar dhe ata që ushtruan dhunë mbi protestuesit, për shkelësit e vërtetë të Kushtetutës të ligjeve në fuqi, e të procedurave demokratike dhe transparencës, sa i përket vendimmarrjes.
Duket sikur demokracia mezi po mbahet në Shqipëri. Por demokracia është aftësia e qytetarëve për t’i befasuar pushtetarët, e nuk është spektakli i propagandës së pushtetit, që ua ledhaton mjekrat atyre. Ata që kanë besuar se pushteti i tyre është i pakufishëm, dhe se mund të shkelin e të përjashtojnë grupet shoqërore duke i etiketuar si pakica, përfundojnë të zhgënjyer. Duhet liruar Boiken Abazi, duhen liruar protestuesit dhe të mbahen përgjegjës rrënuesit, që të mos rrënohet e gjitha.”- thuhet në deklaratën e VV-së në Tiranë.
Personat e arrestuar më 17 Maj janë: Boiken Abazi, Kastriot Qemaj, Sokol Ndoj, Romeo Lila, Endrit Mertiri, Burim Tafilica, Edjon Xhoxhaj. Ata akuzohen për kundërshtim të policëve dhe grumbullim të paligjshëm.
