Kryeministri Edi Rama ka dhënë lajmin se duke nisur nga nesër, do të hapen aplikimet për financim nga skema kombëtare për të gjithë fermerët e interesuar.
Rama thotë se duan apo nuk duan kritikët e kundërshtarët e tij, ndryshimet në bujqësi po ndodhin.
“MIRËMËNGJES
duan s’duan ata që kurrë nuk do duan të shohin e të pranojnë ndryshimet reale, sot në bujqësi ndryshimi real po ndodh dhe falë edhe rritjes së aftësisë thithëse të fondeve të Bashkimit Europian, ku këtë vit jemi në vendin e parë për financime në mbështetje të projekteve të fermerëve, janë plot investime të reja në proces, në një shumë të përgjithshme për mbështetjes së bujqësisë pakrahasimisht më të lartë se më pare.
Nga ana tjetër skemat kombëtare të mbështetjes me fondet e buxhetit të shtetit, janë harmonizuar me skemat e programit të BE-së dhe adresojnë nevoja specifike që nuk mbulohen nga financimet europiane.”– shkruan Rama.
Më tej ai thotë se procesi i aplikimit tanimë është lehtësuar, duke mos i detyruar qytetarët të lëvizin nga shtëpitë e tyre për të bërë aplikimin, pasi mund ta bëjnë fare lehtë edhe nga kompjuteri.
“Jo vetëm kaq, po procesi i aplikimeve nga fermerët është kthyer nga nje torturë letrash, ecejakesh, pritjesh e rryshfetesh, në një proces fare të thjeshtë pa lëvizur nga shtëpia apo nga fshati, ku përmes smartfonit apo kompjuterit më të afërt, në pak minuta aplikimi i shkon AZHBR-së dhe miratimi bëhet në transparencë të plotë.
Nesër hapen aplikimet për financim nga skema kombëtare dhe duke ju uruar sukses aplikantëve, uroj të keni të gjithë një ditë të mbarë”- shkruan Rama.
