Partia Demokratike e Lëvizja Socialiste për Integrim kanë propozuar disa ndryshime në mbledhjen e sotme të Këshillit Politik për reformën zgjedhore.
Ndërsa më herët palët kanë rënë dakord për periudhën zgjedhore, financimin e partive dhe kuotat gjinore, nuk po gjendet ende marrëveshja për futjen e teknologjisë në zgjedhje dhe qeverinë tranzitore.
Mbrëmjen e sotme përfaqësuesit e opozitës kanë lëshuar në tavolinë disa propozime të tjera lidhur me reformën zgjedhore. Ata kërkojnë ndalimin e burimeve publike në mbështetje të kandidatëve, partive apo koalicioneve.
Bëhet fjalë për burime të luajshtme e të paluajtshme si dhe çdo burim njerëzor si përdorimi i nëpunësve të administratës brenda orarit të punës apo i nxënësve.
Tjetër kërkesë është ndalimi i marrjes në punë, lëvizja apo pushimi prej saj në institucionet publike. Ndërsa kërkesa kryesore është qeveria teknike 100 ditë para zgjedhjeve.
Sipas PD-LSI, ajo duhet të garantojë asnjansësi të institucioneve publike, barazinë e trajtimit të kandidatëve si dhe zhvillimin e zgjedhjeve të lira e të ndershme.
Propozimi i opozitës
Në ligjin nr. 10019, datë 29.12.2008 “Kodi Zgjedhor i Republikës së Shqipërisë”, i ndryshuar, bëhen, këto shtesa dhe ndryshime:
Neni 1
Pas nenit 5, shtohen nenet 5/1 me përmbajtje si më poshtë vijon:
Neni 5/1
Ndalimi i përdorimit të burimeve publike në mbështetje të subjekteve zgjedhore
Me përjashtim të rasteve të parashikuara me ligj, nuk mund të përdoren ose të vihen në mbështetje të kandidatëve, të partive politike ose të koalicioneve në zgjedhje burime të organeve apo enteve publike në nivel qendror ose vendor, apo çdo lloj enti tjetër ku shteti zotëron kapitale apo kuota ose/dhe emëron shumicën e organit mbikëqyrës apo organit administrues të entit, pavarësisht nga burimi i kapitalit ose pronësia.
Në kuptim të këtij neni, “burime” quhen asetet e luajtshme dhe të paluajtshme, të parashikuara në nenin 142 të Kodit Civil, si dhe çdo burim njerëzor i institucionit.
Me përdorim të “burimeve njerëzore” kuptohet përdorimi i detyruar në fushatë zgjedhore i administratës së institucionit brenda orarit të punës për qëllime zgjedhore, si dhe përdorimi i detyruar dhe i organizuar brenda orarit mësimor i nxënësve të sistemit shkollor parauniversitar në fushatë zgjedhore.
Gjatë fushatës zgjedhore ndalohet marrja në punë, pushimi nga puna, lirimi, lëvizja dhe transferimi në detyrë në institucionet apo entet publike, me përjashtim të rasteve të përligjura apo rasteve të parashikuara në nenin 5/2 të këtij ligji.
Konsiderohen raste të përligjura rastet kur lëvizja apo lirimi nga puna vjen si rrjedhojë e shkeljeve, sipas legjislacionit përkatës, ose marrja në punë bëhet brenda strukturës dhe organikës në fuqi përpara fushatës zgjedhore nga institucioni apo enti publik në përmbushje të misionit të tij.
Bëjnë përjashtim rastet e emergjencave për shkak të ngjarjeve të paparashikuara që diktojnë marrjen në punë.
100 ditë përpara ditës së zgjedhjeve parlamentare, Kuvendi i Shqipërisë, miraton përbërjen e Qeverisë Kujdestare të Zgjedhjeve, e cila pas betimit përpara Presidentit të Republikës, fillon ushtrimin e detyrës për të garantuar standardet për zgjedhje të lira dhe të ndershme, me funksion të posaçëm ndalimin e përdorimit të burimeve publike në mbështetje të subjekteve zgjedhore.
Ky rregull zbatohet deri në hyrjen në fuqi të marrëveshjes për anëtarësimin e Republikës së Shqipërisë në Bashkimin Europian.
Qeveria Kujdestare e Zgjedhjeve ka për detyrë:
- të sigurojë asnjanësi dhe paanshmëri të institucioneve të administratës publike në procesin zgjedhor;
- të sigurojë barazinë e trajtimit midis kandidatëve dhe partive të ndryshme në lidhje me burimet administrative;
- të sigurojë barazi ndërmjet të gjithë subjekteve zgjedhore, duke mbrojtur nga keqpërdorimi i mundshëm i burimeve administrative për qëllime politike.
Rregullat e posaçme për organizimin dhe funksionimin e Qeverisë Kujdestare të Zgjedhjeve, përcaktohen si Aneks i ligjit nr. 9000, datë 30.1.2003 “Për organizimin dhe funksionimin e Këshillit të Ministrave”.”.
Neni 2
Neni 88, shfuqizohet.
