Ditët e fundit, publicisti i njohur italian Vittorio Sgarbi zbuloi se po kalonte pushimet në jug të Shqipërisë. E në këtë udhëtim e shoqëronte kryebashkiaku i Vlorës, Dritan Leli.
Pas videove të famshme që qarkulluan të Sgarbit ku rrezikonte të mbytej në bregdetin në Palasë, apo videos me makinë me Lelin, publicisti tanimë ka publikuar një foto në “Instagramin e tij nga Bylisi”, të cilin e quan qytet antik grek.
Mesa duket dikush që e ka shoqëruar Sgarbin të vizitonte qytetin antik, e ka informuar gabim duke i thënë se është grek dhe jo ilir.
Lidhur me këtë ka reaguar arkeologu dhe profesori i njohur Neritan Ceka, i cili përmes një postimi në Forumin për Mbrojtjen e Trashëgimisë Kulturore ka reaguar mjaft ashpër, duke fajësuar Ministrinë e Kulturës për keqinformimin.
“KUSH DO IA KETE THENE ZGARBIT QE BYLIS ESHTE GREK ?
Nuk mjaftoi qe bene grek Butrinti, tani edhe Bylisi na doli qytet grek. Bilmezat e Ministrise se Kultures nuk i thane se ishte ne mes te mallakastrioteve dhe po i falej leberve. Keta pasardhes te grekeve jane? I nderuar Zgarbi, falju edhe nje here zotit te Bylisit te na shpetoje nga injoranca e Ministrise se Kultures. Amen!”- citohet të thotë Ceka.
Pak ditë më parë Sgarbi pati takuar në Tiranë dhe ministren e Kulturës, Elva Margariti, pasi vizitoi Galerinë e Arteve. Menjëherë pas takimit me Margaritin, Sgarbi nisi udhëtimin drejt qyteteve të jugut ndërsa shoqërohej nga Leli.
