Spanja ka vendosur të hapë klubet e natës dhe diskotekat duke nisur nga kjo e hënë. Mediat në Spanjë shkruajnë se Ministria e Shëndetësisë ka vendosur që klubet e natës të rifillojnë aktivitetin e tyre, por duke respektuar disa rregulla strikte.
Një nga kushtet është që të mos kalohet një e tretat e kapacitetit, me klientët që duhet të respektojnë distancën sociale. E po ashtu ndalohet vallëzimi, edhe pse kjo është arsyeja kryesore pse të rinjtë i frekuentojnë klubet e natës.
Në rast se lokalet kishin hapësirë për një pistë vallëzimi, kjo hapësirë mund të përdoret për të vendosur tavolina për të ulur klientët, por s’mund të përdoret më për të kërcyer.
Po kështu, në fazën e tretë të planit të de-përshkallëzimit, hotelet dhe restorantet mund të hapen për publikun për konsum edhe në ambientet e brendshme, me kusht që ato të mos kalojnë 50% të kapacitetit të tyre. Rregullat e reja vlejnë vetëm për rajonet që kanë arritur në fazën 3 të planit të rreptë të de-përshkallëzimit të koronavirusit.
