Shpërthimi i Covid-19 mund të ketë filluar disa muaj para se të zbulohej në Wuhan, Kinë në dhjetor, sipas një grupi studiuesish.
Por ata pranuan se gjetjet e tyre nuk janë përfundimtare. Imazhet satelitore nga Wuhan-i si dhe të dhënat e motorit të kërkimit, tregojnë për mundësinë që Covid-19 po përhapej në qytet qysh gushtin e kaluar, argumenton një punim i botuar nga Shkolla Mjekësore Harvard.
Ekipi i studiuesve pas studimit ekzaminoi imazhet satelitore me rezolucion të lartë të parkingjeve spitalore në qytetin kinez dhe përcaktoi që kishte pasur një rritje të shpejtë në vizitat spitalore në fund të verës së vitit 2019.
Ata analizuan gjithashtu të dhëna për motorin e kërkimit nga gjiganti i teknologjisë kineze, Baidu.
Ekipi zbuloi se kishte një rritje të dukshme në pyetjet e motorëve të kërkimit për ‘diarrenë’, e cila është identifikuar si një simptomë e Covid-19 që nuk është e lidhur zakonisht me sëmundjet normale të frymëmarrjes.
Të marra në tërësi, të dhënat tregojnë se sëmundja qarkullonte në qytet muaj para se të zbulohej së pari në një treg ushqimesh deti. Sidoqoftë, studiuesit pranuan se përfundimi i tyre kërkonte hetime të mëtejshme.
