Deputeti i Partisë Socialiste, Ervin Bushati, në emisionin “Byro Politikë në Abc News u shpreh se shteti shqiptar ka treguar që është një partner i besueshëm për tregjet ndërkombëtare, ndërsa shtoi se sot Shqipëria ka performancë, prej qeverisjes 10 herë me të mirë se Gjermania dhe 50 herë më të mirë se Italia.
“Ky është momenti që financat publike mund të shpëtojnë ekonominë shqiptare. Tregjet ndërkombëtare janë vlerësuesi më gjakftohtë. Shteti shqiptar është në partner i besueshëm, sjellja e mirë me financat publike bën që të jemi partner i besueshëm për tregjet ndërkombëtare. Shumë shtete sot në botë po ndërmarrin një rrugëtim të tillë duke financuar ekonominë nëpërmjet borxhit”-tha Bushati.
Bushati më pas shtoi se financat publike nuk duhet të tregohen më dorështrënguara.
“Ky është momenti ku ndërhyhet në treg. Nuk mund të sakrifikojmë ekonominë dhe shoqërinë. Kjo krizë është më e madhe në 100 vite. Ekonomia po kalon një sprovë të fortë dhe kjo tregon se ne paskemi qenë edhe më të fortë. Kjo që po ndërmerret sot, po bëhet që bizneset të kenë një frymëmarrje. Kemi pasur një sjellje të mirë fiskale që tregjet na vlerësuam”- u shpreh ai.
Bushati më tej theksoi se vendi ka një performancë shumë herë më të lartë nga mirëqeverisja.
“Nga pandemia ne jemi vendi që ka pasur më pak tragjedi në Europë. Ne jemi shtet dhe kemi përgjegjësi. Nuk jemi thjesht kompani, kemi detyrë të shpëtojmë qytetarët dhe të shpëtojë ekonomia. Unë di këtë që sot Shqipëria ka performancë, prej qeverisjes 10 herë me të mirë se Gjermania dhe 50 herë më të mirë se Italia”- u shpreh Bushati.
