Të paktën 59 persona janë vrarë gjatë një sulmi në pjesën verilindore të Nigerisë.
BBC shkruan se persona të armatosur u futën në një fshat të rajonit Borno të martën pasdite, duke lënë të vrarë dhjetëra persona. Fshati u rrënua gjithashtu.
Asnjë grup nuk e ka marrë ende përgjegjësinë për këtë sulm i cili mendohet se është një sulm hakmarrës xhihadist. Agjencia e lajmeve “AFP” raportoi se 59 trupa të pajetë janë gjetur në vendin e sulmit, por “Reuters” shkroi se në këtë sulm janë vrarë 69 persona.
“Reuters” shkruan se militantët e kryen këtë sulm pasi dyshuan se banorët e fshatit kishin ofruar të dhëna për forcat e sigurisë rreth lëvizjeve të grupit, ndërsa “AFP” thotë se xhihadistët janë vrarë nga banorët lokalë, të cilët mundoheshin t’ë mbronin gjedhët e tyre.
Ndonëse nuk është e qartë kush qëndron prapa këtij sulmi, grupi “Boko Haram” dhe një grup tjetër që lufton nën parullën e ISIS-it kanë kryer sulme vdekjeprurëse në pjesën verilindore të Nigerisë në të kaluarën.
