Policia e kryeqytetit u bën thirrje qytetarëve që të respektojnë me rigorozitet protokollin e sigurisë, në mënyrë që të parandalohet përhapja e Covid-19.
Për shkak të numrit në rritje të personave të infektuar, policia ka rritur prezencën në dyqane, markete, tregje, pranë bankave, për të këshilluar qytetarët të mbajnë maska e doreza në ambiente të mbyllura e të ruajnë distancën sociale jo më pak se 1.5 metra nga njëri-tjetri.
Uniformat blu bëjnë thirrje që të mos ketë grumbullime në vende të mbyllura, ceremoni festive apo mortore. Madje, policia thotë se disponon listën me emrat e personave që janë të infektuar, dhe do të marrë masa nëse konstaton thyerje të karantinës nga këta persona.
NJOFTIMI I POLICISË
🔴 Respektoni protokollet e sigurisë, për të mos rrezikuar shëndetin e tuaj dhe të të tjerëve, distancimin social, bëni kujdes në ceremonitë festive dhe ato mortore, duke mos u grumbulluar në mënyrë masive!
🔴 Mos qëndroni grumbull në ambientet e brendshme të lokaleve, bareve, restoranteve, qendrave tregtare apo marketeve dhe mos pranoi shërbim klienti nga persona që nuk kanë vendosur maska mbrojtëse dhe dorezat!
🔴 Shmangni grumbullimet në ambiente publike, pasi janë në kundërshtim me protokollet e sigurisë dhe janë rrezik potencial për t’u infektuar dhe përhapur COVID-19!
🔴 Kushdo që është i infektuar me COVID-19, të respektojë në mënyrë rigoroze vetëkarantinimin, pasi Policia disponon të gjitha listat e përditësuara me emrat e personave të infektuar dhe do vijojë ushtrimin e kontrolleve të pandërprera për monitorimin e kësaj kategorie, duke marrë masa për cilindo që shkel këtë rregull, sipas sanksioneve ligjore në fuqi.
Të nderuar qytetarë, Drejtoria Vendore e Policisë Tiranë ju falënderon për mirëkuptimin dhe bashkëpunimin tuaj, për ta kaluar së bashku këtë situatë të vështirë!
