Opozita e Bashkuar ka deklaruar përmbylljen me konsensus të marrëveshjes së arritur më 5 qershor për Reformën Zgjedhore.
Ajo bën thirrje për miratimin pa vonesa në Kuvend të këti drafti dhe i kërkon qeverisë miratimin pa asnjë ndryshim.
Po kështu në deklaratën drejtuar qeverisë, i bëhet thirrje kësaj të fundit që të heqë dorë nga provokimet e manovrat që do minonin konsensusin e arritur.
Deklarata
Sot është përmbyllur kodifikimi me konsensus i Dakordësisë së 5 Qershorit për Reformën Zgjedhore, duke shënuar një kontribut real të opozitës për plotësimin e 1 nga 15 kushtet për hapjen e negociatave me Bashkimin Europian.
Opozita e Bashkuar kërkon miratimin pa vonesa të draftit të depozituar zyrtarisht në Kuvend, sipas Marrëveshjes Politike të 14 Janarit.
Qeveria duhet t’i përmbahet angazhimit për miratimin e Reformës Zgjedhore pa asnjë ndryshim, duke hequr dorë nga manovrat apo provokimet, që do të minonin konsensusin e arritur midis forcave politike.
Zbatimi sa më parë i ndryshimeve ligjore do të mundësonte jetësimin e garancive shtesë, përfshirë fillimin nga puna sa më parë të KQZ për implementimin e identifikimit biometrik.
Opozita e Bashkuar falënderon edhe njëherë partnerët ndërkombëtarë për ndihëm e çmuar që kanë dhënë gjatë procesit dhe për nxitjen e palëve politike drejt këtij konsensusi që i hap rrugë zgjedhjeve.
