Opozita i është përgjigjur pozitivisht ftesës së përfaqësuesit të PS-së në Këshillin Politik.
Nëpërmjet një letre drejtuar Gjiknurit, përfaqësuesi i PD-së, në tryezë tha se opozita e bashkuar mirëpret reflektimin e mazhorancës lidhur me vendimmarrjen konsensuale në Këshilli Politik.
Në letër thuhet gjithashtu se opozita është e gatshme të marrë pjesë në mbledhje ku përveç Bylykbashit e Vasilit do marrë pjesë edhe Sekretari i Përgjithshëm, Bardhi.
Më herët, përfaqësuesi i PS-së në Këshillin Politik, Gjiknuri, u dërgoi një letër përfaqësuesve të opozitës jashtë parlamentare duke i ftuar të ritakohen në Këshillin Politik, në një tryezë ku sipas Gjiknurit do marrë pjesë edhe Rama.
Letra
Në emër të opozitës, mirëpresim reflektimin tuaj për të vijuar diskutimin dhe vendimmarrjen konsensuale në Këshillin Politik për çdo çështje lidhur me zgjedhjet, siç kemi rënë dakord me shkrim në Marrëveshjen Politike të 14 Janarit dhe Dakordësinë e 5 Qershorit.
Paraprakisht ju konfirmojmë se dokumenti i depozituar nga një grup deputetësh të mazhorancës dhe që përmban produktin e dakordësuar në Tryezën e Këshillit Politik (siç ju rikonfirmoni me e-mail më sipër) duhet të miratohet sa më parë dhe pa asnjë ndryshim, dhe për këtë arsye, nuk mund të rihapet asnjë çështje që është dakordësuar aty.
Për çdo çështje tjetër, ne jemi të gatshëm, në orën e caktuar nga ana juaj, si të hënë ashtu edhe të martën, pa patur një preferencë për këtë. Presim konfirmimin tuaj për ditën që ju preferoni, duke shprehur gatishmërinë tonë për pjesëmarrjen në atë mbledhje.
Në lidhje me ndryshimin e formatit të përbërjes së Këshillit Politik, nëse ju keni vlerësuar si të përshtatshme zgjerimin e përfaqësuesve të partive politike në Grupin e Punës së Këshillit Politik, atëherë ju bëjmë me dije se Opozita e Bashkuar do të përfaqësohet përveç nesh, edhe nga Sekretari i Përgjithshëm i Partisë Demokratike z. Gazment Bardhi.
Mbetemi në pritje të konfirmimit të ditës nga ana juaj,
Me respekt,
Oerd Bylykbashi
Petrit Vasili
