SHBA-ja dhe Britania e Madhe kanë akuzuar Rusinë për testimin e një predhe të ngjashme me armë në hapësirë që mund të përdoret për të synuar satelitët në orbitë.
Departamenti i Shtetit në SHBA e përshkroi si shqetësuese përdorimin e “asaj që do të duket të jetë një armë anti-satelitore brenda orbitës”.
Ministria ruse e mbrojtjes tha më herët se po përdor teknologji të re për të kryer kontrolle në pajisjet ruse hapësinore.
SHBA edhe më parë kishte ngritur shqetësime për aktivitetin e ri satelitor rus. Por është hera e parë që Britania e Madhe ka bërë akuza në lidhje me aktivitetin rus në hapësirë, shkruan BBC.
Kreu i drejtorisë hapësinore britanike zv-marshal Harvey Smyth, tha: “Ne jemi të shqetësuar nga mënyra sesi Rusia ka testuar një nga satelitët e saj duke lëshuar prej tij një mjet me karakteristikat e një arme”.
“Veprimet si ky kërcënojnë përdorimin paqësor të hapësirës dhe rrezikojnë të shkaktojnë mbeturina që mund të përbëjnë një kërcënim për satelitët dhe sistemet hapësinore nga të cilat varet bota”– tha ai.
Ai i kërkoi Rusisë që të jetë “përgjegjëse” dhe të “shmangë çdo testim të mëtejshëm”.
Rusia, Mbretëria e Bashkuar, SH.B.A dhe Kina janë ndër më shumë se 100 kombet që janë zotuar për një traktat hapësinor që përcakton që hapësira e jashtme të eksplorohet nga të gjithë dhe thjesht për qëllime paqësore. Traktati shton se armët nuk duhet të vendosen në orbitë ose në hapësirë.
