Policia meksikane ka arrestuar Jose Antonio Yepez, një udhëheqës famëkeq i bandave të drogës dhe hajdut karburanti që akuzohet për nxitjen e dhunës në vend, gjë që ka testuar rëndë qeverinë e presidentit Andres Manuel Lopez Obrador.
I njohur si ‘El Marro’, Yepez u arrestua në orët e para të së dielës nga ushtarët gjatë një sulmi ndaj një shtëpie në Guanajuato, një shtet qendror që është bërë pikë kryesore për dhunën e bandave, thanë autoritetet .
“Kjo është një goditje jashtëzakonisht e suksesshme për qeverinë,” tha Raul Benitez, një ekspert i sigurisë në Universitetin Kombëtar Autonom të Meksikës (UNAM).
Bosi i Santa Rosa de Lima Cartel, një kartel me bazë në Guanajuato, është angazhuar në një luftë të përgjakshme për epërsi në shtet me kartelin e gjeneratës së re Jalisco (CJNG), një nga bandat më të fuqishme dhe të dhunshme të Meksikës.
Yepez, 40 vjeç, është narkoja i profilit më të lartë i arrestuar deri më tani nën presidencën e Lopez Obrador, i cili u zotua të rrëzojë nivelet rekord të dhunës që kanë pllakosur Meksikën kur ai mori detyrën në dhjetor 2018.
Qeveria e Guanajuatos tha se forcat e sigurisë e kapën Yepezin dhe pesë anëtarë të tjerë të dyshuar të bandës në një fshat të quajtur Franco Tavera në komunën Santa Cruz de Juventino Rosas, disa milje në veri të vendit, ku edhe u formua Santa Rosa de Lima Cartel.
