Policia zbardh detajet për vrasjen e Gëzim Saraçit një ditë më parë në Gjirokastër.
33-vjeçari i dyshuar, Mihal Thimjo, është kapur pas gjashtë orësh kërkime.
Gëzim Saraçi, u gjet i pajetë brenda mjetit të tij pasditen e djeshme, në aksin rrugor rural Polican-Suhë.
Viktima dhe i dyshuari kishin njohje të vjetër familjare me njëri – tjetrin dhe madje kishin qenë duke drekuar në Poliçan të Zagorisë ditën e krimit.
Policia dyshon se gjatë kthimit, dy personat janë konfliktuar mes tyre dhe viktima ka goditur i pari 33-vjeçarin, i cili është kundërpërgjigjur duke e goditur atë me levë. Mihal Thimjo u gjet i plagosur në shpatull dhe në këmbë, pas gjashtë orësh kërkime.
Sipas uniformave blu, 33-vjeçari pas vrasjes kishte shkuar në banesë, ka ndërruar rrobat me të cilin ka kryer krimin, ka marrë makinën dhe është nisur për rrugë. Në ato momente është ndaluar nga policia.
NJOFTIMI I POLICISË
Zbardhet në kohë rekord ngjarja e ndodhur në datën 05.08.2020, në aksin rrugor Poliçan-Suhë, ku u gjet i pajetë 57-vjeçari G. S.
Pas 6 orë kërkimesh dhe kontrollesh në të gjithë zonën u bë i mundur lokalizimi, kapja dhe prangosja e autorit të dyshuar të vrasjes.
Policia gjeti dhe sekuestroi në një banesë tjetër edhe rrobat që autori kishte veshur gjatë kryerjes së krimit.
Menjëherë pas marrjes së njoftimit se në aksin Poliçan-Suhë ishte gjetur i pajetë shtetasi G. S., strukturat e Drejtorisë Vendore të Policisë Gjirokastër organizuan punën për zbardhjen e ngjarjes.
Falë punës së mirorganizuar hetimore të kryer nga Sektori për Hetimin e Krimeve të Rënda në DVP Gjirokastër, në bashkëpunim me Prokurorinë e Rrethit Gjyqësor Gjirokastër, u bë e mundur zbardhja e ngjarjes dhe identifikimi i autorit.
Rreth 50 forca policore, pas 6 orë kërkimesh, krehje të zonës, kontrolleve në disa ambiente dhe banesa të dyshuara dhe falë përdorimit të metodave proaktive, bënë të mundur lokalizimin e vendndodhjes së autorit, kapjen dhe shoqërimin e tij në ambientet e Drejtorisë Vendore të Policisë.
Në përfundim të veprimeve të para hetimore të kryera, u bë arrestimi në flagrancë i shtetasit M. Th., 33 vjeç, banues në Dervician, për veprën penale “Vrasja me dashje”, pasi gjatë një konflikti për motive të dobëta, ka goditur me sende të forta shtetasin G. S., 57 vjeç, banues në Humelicë, Gjirokastër, duke i shkaktuar vdekjen.
Materialet i kaluan Prokurorisë pranë Rrethit Gjyqësor Gjirokastër, për veprime të mëtejshme.
