Ministria e Shëndetësisë i është përgjigjur denoncimit të sotëm nga Partia Demokratike. Në një reagim zyrtar, thuhet se strategjia për përballimin e pandemisë Covid-19 nuk ka ndryshuar.
Po kështu ministria thotë se spitalet 3 e 4 janë të pajisur me bazën materiale dhe janë të gatshëm të presin stafet mjekësore e pacientët.
Sipas njoftimit, spitalet 3 e 4 covid do hapen pasi spitalet 1 e 2 covid të mos kenë më shtretër e mundësi për trajtimin e pacientëve.
Paraditen e sotme përfaqësuesi i PD-së, Koduzi, tha se spital Covid 3 nuk ishte i gatshëm për pacientët dhe e gjitha ishte një lojë e kryeministrit Rama.
“Ministria e Shëndetësisë dhe Mbrojtjes Sociale, siguron edhe një herë qytetarët, se asnjë presje nuk ka ndryshuar nga strategjia jonë e përballimit të pandemisë Covid-19.
Siç kemi informuar edhe më herët, Spitalet Covid-3 dhe Covid-4 janë tërësisht të pajisur dhe të gatshëm të presin personelin mjekësor që do të punojë, dhe qytetarët që do të marrin shërbim shëndetësor. Por, siç e parashikon plani ynë – dhe siç e kërkon logjika – Covid-3 dhe më pas Covid-4, do të hapen pasi të jenë ezauruar shtretërit në Covid-1 dhe Covid-2.
Kjo është edhe përgjigja ndaj shqetësimit të ngritur nga Partia Demokratike, se ‘ende në Covid-3 nuk është trajtuar asnjë pacient me Covid’. Pacientët do të trajtohen, kur ky spital të hapet. Ftojmë qytetarët, dhe Partinë Demokratike, që të ndjekin komunikimet e përditshme zyrtare të Ministrisë së Shëndetësisë dhe Mbrojtjes Sociale, për t’u informuar. Faleminderit.” – thuhet në reagimin e ministrisë.
