Presidenti amerikan Donald Trump është larguar papritmas nga një konferencë për mediat, pasi një agjent i Shërbimit Sekret e lajmëroi për disa të shtëna me armë që u qëlluan jashtë Shtëpisë së Bardhë.
Agjenti doli në skenë kur Trump po fliste për gazetarët dhe i pëshpëriti në vesh.
Trump u dëgjua të thoshte “Oh! Çfarë po ndodh?” dhe la dhomën.
Presidenti u kthye nëntë minuta më vonë për të thënë se situata ishte nën kontroll dhe se një njeri ishte qëlluar.
Presidenti Trump u tha gazetarëve se ai besonte se Shërbimi Sekret i SHBA.-së kishte qëlluar një të dyshuar, i cili ishte i armatosur.
Ai tha se nuk e dinte nëse personi kishte ndonjë synim të keq ndaj tij.
“Mund të mos ketë ndonjë lidhje me mua.”– tha presidenti, citon BBC.
Trump pranoi se ishte një situatë e pazakontë, por vlerësoi profesionalizmin e Shërbimit Sekret Amerikan.
Një gazetar e pyeti Trump nëse ishte tronditur nga ngjarja.
“A dukem i tronditur?”- u përgjigj ai. Më pas shtoi: “Është për të ardhur keq që kjo është bota, por bota ka qenë gjithmonë një vend i rrezikshëm. Nuk është diçka që është unike.
Bota ka qenë, nëse shikoni mbrapa ndër shekuj, bota ka qenë një vend i rrezikshëm, vend shumë i rrezikshëm dhe do të vazhdojë besoj, për një periudhë kohe.”
Trump u tha gazetarëve se ishte shoqëruar në Zyrën Ovale jashtë dhomës së konferencave gjatë incidentit.
US President Donald Trump leaves news conference after reports of shooting outside White House https://t.co/VKj77JRawI pic.twitter.com/NLVB70nr2w
— BBC Breaking News (@BBCBreaking) August 10, 2020
