Kryetari i AAK-së Ramush Haradinaj shpalli kandidaturën për President të Republikës së Kosovës.
Haradinaj e konfirmoi personalisht kandidaturën përmes një postimi në rrjetet sociale ku ndër temat e tjera që zbuloi nga takimi me strukturat drejtuese të partisë së tij shpalosi edhe autorizimin e të vetëve për të kandiduar për Kreun e Shtetit.
“Falënderoj Këshillin Drejtues, për besimin e tyre, për autorizimin që me dhanë, që në emër të Aleancës të zhvilloj bisedimet eventuale për rikonfigurimin e qeverisë, përfshirë këtu edhe çështjen e presidentit. Besimin që unë të jem kandidat për president, nëse kjo diskutohet në bazë të kushtetutës, e konsideroj si përgjegjësi të lartë dhe nder të veçantë”-shkruan Haradinaj
Haradinaj tha se forca politike që ai drejton është kundër dialogut teknik me Serbinë ku thekson se ky nivel dialogu ka shkuar gjithmonë në favor të Serbisë.
“Sot në takimin me strukturat udhëheqëse të Aleancës, u diskutuam për zhvillimet politike dhe qeverisëse në vend, me theks të veçantë tek menaxhimi i pandemisë, rimëkëmbja ekonomike, dialogu Kosovë-Serbi dhe mbarëvajtjen e koalicionit qeverisës.
Aleanca qëndron fuqishëm në përkrahjen e menaxhimit efektiv të pandemisë, duke përkrahur bizneset dhe lirinë e lëvizjes së qytetarëve, me masa të propozuara nga ekspertët shëndetësor.
Gjithashtu në dialogun me Serbinë, ne jemi për marrëveshje që sjell njohjen në kufijtë ekzistues, duke ruajtur karakterin unitar të Kosovës së 17 shkurtit.
Ne jemi kundër dialogut teknik, i cili për më shumë se një dekadë i ka shkuar në favor vetëm Serbisë, duke e lënë Kosovën të izoluar”-shkruan kreu i AAK-së.
