Kryeprokurori i Bjellorusisë ka nisur një çështje penale kundër drejtuesve të opozitës, duke i akuzuar se po përpiqeshin të merrnin pushtetin.
Aktakuza nga Alexander Konyuk thotë se “krijimi dhe veprimtaria e Këshillit Koordinues [të opozitës] kanë për qëllim sekuestrimin e pushtetit shtetëror dhe dëmtimin e sigurisë kombëtare“.
Më parë Presidenti Aleksandër Lukashenko urdhëroi policinë që të ndalojë protestat masive kundër tij në kryeqytetin Minsk.
Fitorja e tij në zgjedhjet e 9 gushtit është e diskutueshme.
Shefja e opozitës Svetlana Tikhanovskaya, aktualisht në Lituaninë fqinje, njoftoi krijimin e një Këshilli Koordinues për të siguruar një transferim të pushtetit. Ajo gjithashtu kërkoi nga qeveritë e huaja “ta ndihmojnë në organizimin e një dialogu me autoritetet Bjelloruse”.
Kryeprokurori Konyuk lexoi aktakuzën kundër këshillit në një deklaratë video, duke thënë “krijimi i organeve të tilla nuk lejohet me ligj, dhe ato janë jokushtetuese.
“Disa qytetarë, duke kuptuar se aktivitete të tilla janë të paligjshme, kanë thënë që ata po braktisin këshillin dhe nuk pajtohen me qëllimet e tij.”
Ka pasur 12 ditë protesta në rrugë mbi fitoren rrëshqitëse të Z. Lukashenko, e cila është hedhur poshtë gjerësisht si mashtruese.
