Mbrojtësi i kombëtares shqiptare, Mërgim Mavraj, ka varur këpucët në gozhdë duke e mbyllur ciklin me Shqipërinë.
Njoftimin e ka bërë vetë 34-vjeçari nëpërmjet një videomesazhi në Instagram. Lojtari e ka luajtur ndeshjen e parë me Shqipërinë në 8 shtator 2012 dhe prej atëherë ka luajtur 50 ndeshje me kombëtaren duke shënuar 3 gola.
Ai u aktivizua fillimisht me ekipin Shpresa të Gjermanisë por më pas zgjodhi të përfaqësoë Shqipërinë, me të cilën u kualifikua në finalet e Euro 2016.
I lindur në Hanau nga prindër shqiptarë të Kosovës, Mavraj ka luajtur për një numër të madh klubesh në Gjermani.
Ai është aktivizuar për Darmshtatin, Bohumin, Grojther Fyrthin, Këlnin, Hamburgun e Ingolshtatin.
“Përshëndetje,
Kanë kaluar gati 8 vite që prej shtatorit të 2012-ës, kur unë debutova për herë të parë me Kombëtaren Kuq e Zi, vite të cilat mbase nuk janë të shumta, porse emocionet, sfidat, sakrificat, rëniet, ngritjet dhe sukseset kanë qënë të mëse të mjaftueshme për të skalitur në brendësinë time përjetime të rralla dhe të pashlyeshme. Ky rrugëtim më ka ofruar mundësinë që ta njoh dhe me mirë vendin tim, njerëzit e vendit tim por dhe vet veten time dhe jo vetëm, si shkak i këtij rrugëtimi dhe sportin arrita ta njoh dhe me mirë.
Mirëpo si çdo rrugëtim dhe ky e ka një fund, dhe ky fund është më se i lumtur. Ndaj për këtë dëshiroj të falenderoj të gjithë bashkshoqëruesit e mi duke filluar nga Familja ime, Miqt e mi, Ndjekësit e Kombtares Kuq e Zi, Presidentin Armando Duka, Kolegët e mi dhe të gjithë Stafet Teknike me të cilët kam punuar, edhe pse gjithsecili prej tyre meriton një falenderim personal jam i detyruar që të gjithë falenderimet ti përmbledh në keto pak rreshta.
Mbi të gjitha falënderimet është falenderimi ndaj Zotit, I Cili ma mundësoj këtë fund të lumtur.
Zoti e bekoftë Shqipërinë dhe popullin tonë shqiptar !
Zoti na e mundësoftë që Një Flamur të jetë simboli ynë !
Përzemërsisht,
Mërgim Mustafë Mavraj
