Kreu i Partisë Demokratike, Basha, tha sot se Shqipëria është ndër vendet me largimin më të madh të njerëzve në rajon.
Ai theksoi se shqiptarët largohen sepse kanë më pak mundësi për arsimim e punësim duke vërejtur se nën qeverinë e kryeministrit Rama ata që janë promovuar janë personat me rekorde kriminale.
“Një në çdo 3 persona që ikën nga vendi ynë është i ri apo e re, ndërsa Shqipëria është ndër vendet me largimin më të madh të trurit në rajon, sipas raportit më të fundit nga @Gallup.
Sot shqiptarët largohen sepse kanë më pak mundësi për arsimim, dhe ata që arsimohen më pak mundësi për punësim. Me Edi Ramën janë promovuar ata që kanë rekorde kriminale dhe jo të rinjtë e mirëshkolluar. Taksat e larta të qeverisë Rama këto 7 vjet kanë marrë më shumë para nga xhepat e të rinjve se çdo qeveri tjetër, teksa korrupsioni nuk lë të ecin përpara ata që janë profesionistë të ndershëm.” – shkruan Basha.
Më tej ai thekson se largimi i të rinjve është një plagë e madhe për Shqipërinë duke u zotuar se qeverisja e tij do bëjë gjithçka për t’i mbajtur të rinjtë në vend. Basha shtoi se PD-ja ka një plan për të mbështetur nismën e të rinjve si dhe punësimin e tyre.
Kryedemokrati vërejti se PD-ja do e çlirojë vendin nga monopolet, do ulë taksat, do ketë politike fiskale që mbështet punën dhe do bëjë investime në teknologji.
“Largimi i të rinjve është një plagë tjetër e madhe për Shqipërinë. Ne do të bëjmë gjithçka për ti mbajtur në vendin tonë të rinjtë si krahun më vital të punës. Plani ynë do të mbështesë iniciativat e të rinjve, kushtet e duhura për punësimin dhe sipërmarrjet e tyre. Ata kanë plot ide, pasion dhe energjinë e duhur për ti dhënë një hov të madh pozitiv zhvillimit të vendit. Ne do të çlirojmë tregun nga monopolet që ekonomia jonë të marrë frymë lirisht: me taksa te ulëta, investime në teknologji, dhe një politikë fiskale që mbështet punën. Plani ynë do të krijojë hapësira që kushdo që dëshiron të arsimohet e të punësohet ta bëjë këtë në vendin e vet. Shqiptarët duan një qeveri që kujdeset për njerëzit dhe që ju bëhet atyre krah, një qeveri që ofron mundësi dhe punë per djemtë dhe vajzat tona!” – mbyll reagimin e tij Basha.
