Kellyanne Conway, këshilltare e Presidentit Donald Trump, e njohur për debatet e saj me gazetarët, njoftoi të dielën se do të japë dorëheqjen për t’u përqendruar tek familja.
53 vjeçarja Conway, ka qenë në krah të Trump që në fillim, duke menaxhuar fushatën e tij presidenciale të vitit 2016, që e ngriti atë në postin më të fuqishëm të botës.
Por katër vitet e fundit, ku ajo tregoi besnikëri të palëkundur ndaj Trump, përfshirë duke e mbrojtur presidentin në televizion dhe në paraqitje jozyrtare para medias, kanë sjellë pasojat e tyre për këshilltaren e njohur për polemika të forta, si dhe për përdorimin për herë të parë të shprehjes “fakte alternative”, raporton Zëri i Amerikës.
Ndërsa fitoi reputacion si një nga mbrojtëset më të forta të zotit Trump, bashkëshorti i saj, juristi i njohur George Conway, është një kritik i ashpër i presidentit, i cili vazhdimisht dhe pa ndrojtje vë në pikëpyetje nëse presidenti është mendërisht i aftë të kryejë detyrën.
“Do të largohem nga Shtëpia e Bardhë në fund të këtij muaji”, tha ajo në një deklaratë.
“Edhe George po bën ndryshime. Ne kemi mendime të ndryshme për shumë gjëra, por jemi të bashkuar për çka është më e rëndësishmja: fëmijët”, vazhdon ajo.
Conway tha se katër fëmijët e tyre do të fillojnë vitin e ri akademik në distancë.
“Siç e dinë miliona prindër në gjithë botën, ‘shkollimi i fëmijëve nga shtëpia’ do një shkallë vëmendjeje dhe vigjilence po aq të pazakontë sa edhe vetë koha ku po jetojmë”, tha ajo.
“Tani për tani dhe për fëmijët e mi të dashur, do të ketë më pak dramë dhe më shumë prani mamaje”, shton Conway.
Njoftimi i saj erdhi një ditë pasi vajza e saj 15 vjeçare Claudia shkruante në Twitter se ndjehej e “dërrmuar” që nëna e saj do të fliste në kuvendin republikan dhe premtoi se do të kërkonte shkëputjen ligjore (nga prindërit e saj) “për shkak të viteve të tëra me traumë dhe abuzim në fëmijëri”.
George Conway tha veçmas se do të jepte dorëheqjen nga Projekti Lincoln, një grup me republikanë kundër Trump, që ai e themeloi, si edhe se do të shkëputej tani për tani nga Twitter, rrjeti social që ai e përdorte vazhdimisht për të sulmuar presidentin.
Antipatia ishte reciproke: presidenti Trump e ka quajtur atë “bashkëshortin nga ferri”.
Kellyanne Conway, u vu në qendër të vëmendjes vetëm disa ditë pasi zoti Trump mori detyrën, duke përdorur shprehjen “fakte alternative”, duke mbrojtur pretendimin e diskredituar të Shtëpisë së Bardhë se turma për inaugurimin e presidentit të 45-të të Shteteve të Bashkuara, ishte më e madhe sesa ajo për inaugurimin e Presidentit Obama.
Në vitin 2017, ajo përmendi një sulm terrorist joekzistues, “masakra e Bowling Green”, si argument për të mbrojtur masën e presidentit Trump për ndalimin e imigracionit.
Gjatë mandatit të Trump, Conway u bë e njohur për përplasjet me median, shpesh duke gjetur një mënyrë për të ndryshuar temë, ose thjesht duke u ankuar (për pyetjen).
Një juriste dhe anketuese, ajo vazhdoi të mbetej në postin e saj, ndërsa një numër këshilltarësh të tjerë, janë detyruar të largohen, kanë dhënë dorëheqjen, ose kanë lënë postin të poshtëruar.
Në deklaratën e saj, Conway e përshkroi periudhën në Shtëpinë e Bardhë si “marramendëse” dhe tha se ndjehej e nderuar, duke shtuar se vendimi për largim ishte i saji.
“Kjo është plotësisht zgjedhja ime dhe zëri im. Kur të vijë koha do të bëj të njohura planet për të ardhmen”, tha ajo.
