Gjyqi ndaj bashkëpunëtorëve të sulmit vdekjeprurës në Paris në vitin 2015 ka nisur ditën e sotme ndërsa presidenti Macron ka thënë se revista ‘Charlie Hebdo’ kishte të drejtë të botonte karikaturat e Profetit Muhamed
Macron tha se liria e fjalës në Francë u jep njerëzve të drejtën për të blasfemuar, teksa gjyqi ndaj 13 personave të akuzuar për ndihmën e agresorëve të sulmeve të vitit 2015 në Paris sapo kishte nisur nën masa të rrepta sigurie.
Të pandehurit përballen me një sërë akuzash që nga sigurimi i armëve dhe ndihma logjistike për sulmuesit (Said e Cherif Kouachi dhe Amedy Coulibaly) te financimi i terrorizmit dhe anëtarësimi në një organizatë terroriste.
Gjyqi do të vazhdojë për 10 javë dhe do të filmohet në tërësinë e tij. Në Francë është e ndaluar që të filmohen seancat gjyqësore por ndonjëherë bëhen përjashtime për raste me rëndësi të jashtëzakonshme.
Në janar 2015, sulmet ndaj selisë së revistës satirike franceze ‘Charlie Hebdo’, oficerëve të policisë dhe një supermarketi çuan në 17 njerëz të vrarë në Paris për tre ditë. Personat e armatosur u vranë në një përplasje me policinë.
Të mërkurën, revista ‘Charlie Hebdo’, i njohur për humorin e saj provokues, lëshoi një botim të veçantë, duke ribotuar karikaturat e Profetit Muhamed.
Presidenti francez Emmanuel Macron refuzoi të dënojë karikaturat e Profetit Muhamed. Gjatë vizitës së tij në kryeqytetin libanez, Bejrut, ai tha se Franca ka lirinë e shtypit dhe nuk i takon presidentit të gjykojë zgjedhjet editoriale të bëra nga gazetarët.
“Në Francë ekziston një liri për të blasfemuar që është e lidhur me lirinë e ndërgjegjes. Unë jam këtu për të mbrojtur të gjitha këto liri. Në Francë, dikush mund të kritikojë një president, guvernatorë, politikanë, të blasfemojë. “Satira nuk është një diskurs i urrejtjes.” – tha Macron.
