Policia ka arrestuar pesë persona, për ngjarjen e rëndë që ndodhi mbrëmjen e kaluar në Durrës ku një person humbi jetën dhe djali i tij 19-vjeçar mbeti i plagosur.
Të arrestuarit janë djem të rinj të moshave nga 20-25 vjeç.
Ngjarja ndodhi mbrëmë në lagjen numër 13 në Durrës, ku babë e bir janë përplasur me anëtarët e familjes Tatozi në Durrës në një konflikt me motive pronësie.
Nga përplasja humbi jetën shtetasi Armando Baboçi, 39 vjeç, dhe u plagos i biri, Erald Gjini, 19 vjeç.
Dyshohet se djali ka goditur me shkop një nga anëtarët e familjes Tatozi e më pas ka ndodhur një përplasje masive ku janë përdorur levat e në fund armët e zjarrit.
Babë e bir kanë tentuar të largohen me mjetin e tyre tip ‘Alfa-Romeo’, të cilin e kanë përplasur, por janë qëlluar me armë duke u plagosur.
DETAJET E POLICISË
Zbardhet dhe dokumentohet në kohë rekord ngjarja e ndodhur në lagjen nr.13, Durrës, mbrëmjen e djshme.
Arrestohen në flagrancë 5 shtetas si dhe shpallen kërkim tre të tjerë.
Shërbimet e Policisë Durrës, pas njoftimit se në lagjen nr.13, Plazh, Durrës, kishte të shtëna me armë zjarri, menjëherë kanë shkuar në vendngjarje dhe falë reagimit të menjëhershëm e profesional si dhe gatishmërisë së shërbimeve të tjera të Drejtorisë që ishin në zbatim të të planit të masave me pika kontrolli në të gjith qytetin e Durrësit, për mbajtjen nën kontroll të situatës kriminale, bënë të mundur, identifikimin e personave të përfshirë në konflikt, kapjen dhe arrestimin në flagrancë të shtetasve:
K.D., 20 vjeç, H.T., 23 vjeç dhe S.T., 20 vjeç, banues në Durrës.
Arrestimi i tyre u bë pasi më datë 18.09.2020, rreth orës 20:00, në lagjen nr.13, Plazh, Durrës, pas një konflikti të çastit për motive të dobëta, me mjete të forta e më pas me armë zjarri kanë mbetur të plagosur shtetasit E.Gj., 19 vjeç, H.T., 23 vjeç, të cilët ndodhen në spital nën kujdesin e mjekëve si dhe shtetasi A.B.(Gj)., 39 vjeç, i cili si pasojë e plagëve të marra ndërroi jetë në Spitalin Rajonal Durrës.
Në vijim të veprimeve u arrestuan në flagrancë dhe shtetasit :
E.C.(B)., 25 vjeç dhe A.K., 24 vjeç, banues në Durrës, për veprën penale “Moskallëzim krimi”
Gjithashtu po në vijim të veprimeve janë shpallur në kërkim policor edhe tre shtetas të tjerë ku vijon puna për kapjen e tyre.
Janë sekuestruar në cilësinë e provës materiale 3 automjete, 4 aparate celular si dhe pamje filmike në interes të zbardhjes dhe dokumentimit të plotë të ngjarjes.
Materialet i kaluan Prokurorisë së Rrethit Durrës, në ngarkim të shtetasve K.D., H.T., dhe S.T., për veprat penale “Vrasja me paramendim” kryer në bashkëpunim, “Armëmbajtje pa leje” dhe në ngarkim të shtetasve E.C.(B)., A.K., për veprën penale “Moskallëzim krimi”.
