Presidenti Ilir Meta thotë se shembja e Teatrit Kombëtar dhe shkatërrimet arkeologjike në Durrës janë akte barbarie, të cilat nuk mund të amnistohen.
Në Ditën Kombëtare të Trashëgimisë Kulturore, presidenti i vendit Ilir Meta ka kujtuar shembjen e Teatrit Kombëtar në Durrës dhe dëmtimin e zbulimeve arkeologjike në qytetin e Durrësit.
Presidenti Meta i konsideron këto akte krime kushtetuese për të cilat sipas tij, nuk ka amnisti. Meta thotë se është mbajtur shënim çdo gjë dhe se askush nuk ka për t’i shpëtuar Drejtësisë.
KOMENTI I METËS
KOHA PËR DREJTËSI!
Akti taleban i shembjes së Teatrit Kombëtar, shkatërrimi i shumë vlerave unikale arkeologjike në Durrës dhe dëmtimi i disa monumenteve në mbarë vendin janë dëshmitë ulëritëse më të freskëta se si arroganca, korrupsioni dhe papërgjegjshmëria e një pushteti mund të sjellë dëme të pariparueshme për trashëgiminë tonë kombëtare e kulturore, pjesë e trashëgimisë evropiane.
Të gjitha këto krime të rënda kushtetuese, ligjore dhe morale, të konsumuara veçanërisht në Tiranë dhe Durrës ku dëmet kanë qenë të jashtëzakonshme, do të jenë të paamnistueshme!
Sepse këto akte barbarie, për më tepër të kryera nga institucionet shtetërore, janë sulme të drejtpërdrejta ndaj identitetit tonë kombëtar.
Ndaj sot në Ditën Kombëtare të Trashëgimisë Kulturore i garantoj të gjithë shqiptarët se gjithçka është mbajtur shënim dhe askush nuk ka për t’i shpëtuar Drejtësisë!
Duke kujtuar Profesor Paolo Vittin i cili me të drejtë thotë se: “Europa nuk është vetëm euro, por edhe kulturë, solidaritet, humanizëm dhe identitet”, risjell edhe njëherë në vëmendje qëndrimin e “Europa Nostra” në lidhje me shembjen e Teatrit Kombëtar: “Le të jetë kjo ngjarje e mjerueshme ajo që do të shënojë fillimin e një zgjimi të vërtetë të shoqërisë civile në Shqipëri të udhëhequr nga artistë dhe intelektualë”.
Barbaria dhe talebanizmi nuk kanë vend në shoqërinë tonë!
KOHA PËR DREJTËSI!
