Policët francezë kanë zhvilluar një protestë në Paris një ditë pas sulmit ndaj një stacioni policie në kryeqytetin francez. Protesta vjen mes tensioneve në rritje mes policisë dhe qeverisë franceze.
Oficerët u mblodhën përpara selisë së policisë së Parisit të hënën, duke mbajtur në duar tabela ku shkruhej: ‘Policia nën sulm, qytetarët në rrezik’.
Në Champigny-sur-Marne, ku ndodhi sulmi i fundit, policët qëndruan jashtë stacionit të tyre duke mbajtur tabela e pankarta që shkruanin: “Siguria juaj ka një çmim. Ne duam mbrojtje dhe respekt”.
Stacioni i policisë në Champigny-sur-Marne, një periferi e Parisit, u shënjestrua nga një turmë prej rreth 40 personash të armatosur me shufra metalike dhe fishekzjarre të shtunën në mbrëmje.
Dy oficerë që qëndronin jashtë ndërtesës gjatë sulmit arritën të futeshin shpejt brenda dhe të bllokonin dyert para se grupi i armatosur të ishte në gjendje t’i sulmonte ata.
Turma sulmoi hyrjen e stacionit dhe dëmtoi pesë automjete policie. Stacioni gjithashtu u godit nga një breshëri fishekzjarresh të fuqishëm.
Sulmi thuhet se ishte në shenjë hakmarrjeje për një kontroll policor ndaj disa personave, njoftoi media franceze, duke cituar kryetarin e bashkisë.
