Katër anëtarë të Gardës Zviceriane të Papa Françeskut janë vetëizoluar, pasi kanë rezultuar pozitivë në testet për koronavirusin.
Duke iu përgjigjur pyetjeve nga gazetarët, Drejtori i Zyrës së Shtypit të Selisë së Shenjtë, Matteo Bruni, tha se katër raste pozitive të koronavirusit u zbuluan gjatë fundjavës mes anëtarëve të rojeve personale të Papës.
“Aktualisht ata kanë simptoma dhe janë të gjithë të izoluar”- shpjegoi Bruni, citon Vatican News. Ai vazhdoi: “Po kryhen kontrollet e nevojshme midis atyre që mund të kenë qenë në kontakt të drejtpërdrejtë me ta.”
Guvernatori i Shtetit në Vatikan vendosi masa parandaluese javën e kaluar duke përcaktuar që çdo anëtar i Gardës duhet të mbajë maska si jashtë ashtu edhe brenda dhe të respektojë masat e përshkruara shëndetësore, pavarësisht nëse janë në detyrë apo jo.
Pavarësisht rezultateve pozitive të rojeve, Papa Françesku kreu një takim me Kardinalin George Pell, pa veshur maskë.
Përveç rojeve, vetëm tre persona që banojnë në Vatikan janë aktualisht të infektuar me Covid-19.
