Pandemia e COVID-19 mund të shkaktojë një katastrofë arsimore, paralajmëroi sot Papa Françesku, në një videomesazh në Konferencën Ndërkombëtare për Arsimin.
“Sipas disa të dhënave të fundit nga agjencitë ndërkombëtare, flitet për katastrofë arsimore, për afërsisht 10 milionë fëmijë, që mund të detyrohen të lënë shkollën për shkak të krizës ekonomike të gjeneruar nga COVID-19”, tha ai, përcjell ATSH.
Lideri shpirtëror i katolikëve theksoi se kjo rrezikon të rrisë hendekun tashmë alarmues arsimor, me mbi 250 milionë fëmijë të moshës shkollore të përjashtuar nga çdo aktivitet arsimor, prandaj edhe nevojitet një pakt global arsimor përballë krizës shëndetësore aktuale.
