Policia e Shtetit ka gjobitur gjithsej 690 qytetarë gjatë 24 orëve të fundit, pasi ata nuk kishin vendosur maskat mbrojtëse siç urdhëron Akti Normativ i qeverisë.
Përmes një njoftimi për mediat, policia bën me dije se ka ushtruar kontrolle në ambiente të ndryshme në të gjithë vendin, ku ka gjobitur me një gjobë prej 3 mijë lekësh, plot 523 qytetarë që nuk i kishin vendosur maskat mbrojtëse.
Me të njëjtën shumë janë ndëshkuar dhe 167 pasagjerë që janë konstatuar pa maska në automjete private apo në mjetet e transportit publik.
“Krahas përmbushjes së detyrave funksionale për parandalimin, evidentimin dhe goditjen e paligjshmërisë, strukturat e Policisë kanë vijuar kontrollet në terren në të gjithë vendin, për të monitoruar zbatimin e masës së re për parandalimin e përhapjes së COVID-19, mbajtjen e detyrueshme të maskës mbrojtëse, e cila është detyrim për të gjithë qytetarët, që në momentin që dalin nga shtëpia.
Gjatë kontrolleve në ambiente të ndryshme në të gjithë vendin, shërbimet e Policisë kanë konstatuar se shumica e qytetarëve i kishin vendosur maskat mbrojtëse edhe gjatë orëve të mbrëmjes. Po gjatë kontrolleve janë evidentuar dhe ndëshkuar 523 qytetarë që nuk i kishin vendosur maskat mbrojtëse dhe për këtë arsye, secili prej tyre është ndëshkuar me masën administrative me vlerë 3.000 lekë.
Gjithashtu, nga ana e shërbimeve të Policisë Rrugore në të gjithë vendin janë konstatuar dhe ndëshkuar me masë administrative 3.000 lekë, 167 pasagjerë që janë konstatuar pa maska në automjete private (pa lidhje familjare me drejtuesin e mjetit) dhe pasagjerë pa maska mbrojtëse në mjetet e transportit publik.”- thuhet në njoftimin e policisë.
Përveç gjobave, 10 qytetarë janë janë shoqëruar në ambientet e Policisë gjatë kontrolleve, pasi nuk kanë pranuar t’i tregojnë punonjësve të Policisë dokumentin e identifikimit apo nuk e kanë pasur atë me vete. Policia thotë se këta pasi kanë paraqitur dokumentin e identifikimit, janë ndëshkuar me masën administrative prej 3 mijë lekësh dhe më pas janë lënë të lirë.
“Po gjatë kontrolleve janë shoqëruar në ambientet e Policisë në të gjithë vendin, 10 shtetas që nuk kanë pranuar t’i tregojnë punonjësve të Policisë dokumentin e identifikimit apo nuk e kanë pasur atë me vete, të cilët pasi kanë paraqitur dokumentin e identifikimit, janë ndëshkuar me masën administrative 3.000 lekë dhe më pas janë lënë të lirë.
Policia e Shtetit falënderon qytetarët që respektojnë këtë masë mbrojtëse dhe apelon që të gjithë të vendosin maskat mbrojtëse, pronarët e lokaleve të respektojë protokollet e sigurisë dhe të mos kundërshtojnë urdhrin e punonjësve të Policisë, pasi Policia e Shtetit është në shërbim të qytetarëve, për të mbrojtur jetën dhe shëndetin e tyre, ndaj dhe është i rëndësishëm zbatimi i kësaj mase mbrojtëse sepse parandalon infektimin me COVID-19.”– thotë Policia e cila ka publikuar edhe një video nga këto kontrolle.
