Një 70-vjeçar nga Kruja është arrestuar në Mallakastër në kuadër të operacionit premtimi.
Personi me iniciale H.Sh, banues në Thumanë, ishte proceduar edhe dy herë të tjera më herët për mashtrim.
Ai u premtonte banorëve të Ballshit se do i punësonte në një firmë private duke u marrë shuma të ndryshme të hollash.
Sipas policisë, gjatë aksionit janë sekuestruar, fotokopje dokumentesh identifikimi si dhe deklarata noteriale me shuma që shkonin nga 1400 euro në 10 mijë euro të bëra me personat që pretendonin të punësoheshin prej tij.
Njoftimi
Finalizohet me sukses operacioni policor i koduar ‘Premtimi’, për goditjen e veprimtarisë kriminale të mashtrimit, me qëllim përfitimin e vlerave monetare.
Operacioni nga Komisariati i Policisë Mallakastër, në bashkëpunim me Seksionin për Hetimin e Krimit Ekonomik e Financiar në DVP Fier.
Prezantohej si menaxher i një firme për ndërtimin e rrugëve dhe mashtronte qytetarë të ndryshëm duke iu marrë shuma të konsiderueshme parash, me premtimin se do t’i punësonte në firmën e ndërtimit, identifikohet, kapet dhe vihet në pranga 70-vjeçari nga Kruja.
Sekuestrohen dokumente, deklarata noteriale dhe një shumë parash.
Specialistët e Seksionit për Hetimin e Krimit Ekonomik Financiar në DVP Fier, në bashkëpunim me Komisariatin e Policisë Mallakastër, pas informacioneve të marra në rrugë policore se në qytetin e Ballshit, një shtetas po mashtronte qytetarët duke iu premtuar t’i punësonte në një firmë private kundrejt shumave të ndryshme lekësh, organizuan punën dhe finalizuan me sukses operacionin policor të koduar ‘Premtimi’.
Si rezultat i operacionit u bë arrestimi në flagrancë i shtetasit H. Sh., 70 vjeç, banues në Thumanë, Krujë, i proceduar më parë dy herë për të njëjtën vepër penale (‘Mashtrimi’).
Pas veprimeve të para hetimore rezultoi se ky shtetas nga data 23.10.2020 deri më datë 27.10.2020, ka mashtruar shumë persona në qytetin e Ballshit duke iu marrë nga një sasi lekësh, me pretendimin se do t’i punësonte.
Gjatë kontrollit në banesën e marrë me qira nga ky shtetas në qytetin e Ballshit, janë gjetur dhe sekuestruar në cilësinë e provës materiale një sasi lekësh, dokumente të ndryshme me emrat e personave të mashtruar nga ky shtetas, fotokopje të mjeteve të tyre të identifikimit dhe kontrata noteriale me shuma që varionin nga 1400 euro-10.000 euro të bëra me shtetasit që i kishte mashtruar me premtimin për t’i punësuar.
Materialet procedurale i kaluan Prokurorisë pranë Gjykatës së Shkallës së Parë Fier, për veprën penale ‘Mashtrimi’.
