Ministri i Jashtëm gjerman Heiko Maas u bëri thirrje këtë të premten të dy palëve në zgjedhjet e SHBA-ve, që të tregojnë vetëpërmbajtje derisa të dalin rezultatet. Ai shtoi se ishte e papërgjegjshme të rriten tensionet.
“Amerika është më shumë se një shfaqje me një njeri. Kushdo që vazhdon t’i hedhë benzinë zjarrit në një situatë si kjo, po vepron në mënyrë të papërgjegjshme.”– tha Maas për mediat gjermane.
“Tani është koha për të mbajtur qetësinë derisa të jetë në dispozicion një rezultat i përcaktuar në mënyrë të pavarur.”– shtoi ai, citon Reuters.
Numërimi i votave po vazhdon në zgjedhjet presidenciale të SHBA-ve. Presidenti republikan Donald Trump ka filluar një sërë procesesh gjyqësore duke shpresuar të ngadalësojë kundërshtarin e tij, demokratin Joe Biden, dhe tensionet janë rritur në disa vende.
“Në mënyrë që rezultati i cili nuk është përcaktuar ende të pranohet, të gjithë duhet së pari të tregojnë përmbajtje.”- i tha Maas gazetës Funke në një intervistë.
“Humbësit e denjë janë më të rëndësishëm për funksionimin e një demokracie sesa fituesit rrezatues”– shtoi ai.
Biden ka fituar deri tani një epërsi të ngushtë ndaj Trumpit në shtetin e Xhorxhias për herë të pare.
“Me një shumicë kaq të ngushtë, është shumë e lehtë të gjesh veten në anën e humbjes.”– tha Maas. “Kjo tregon se sa e rëndësishme është të punosh për të kapërcyer ndarjen politike.”
Maas tha se ai priste që pas rezultatit të zgjedhjeve “SHBA-të ndoshta nuk do të kthehen në skenën ndërkombëtare me energji të plotë”. Por ai shtoi: “Bota ka nevojë për SHBA-të si një forcë për rendin, jo si një faktor kaosi.”
