Qeveria e Kievit i ka dhënë një listë me 11 persona delegacionit rus për shkëmbimin e të burgosurve deri në fund të vitit me separatistët pro-rusë në rajonin Donbas të Ukrainës.
Leonid Kravçuk, Shef i Delegacionit Trilateral të Kontaktit në Ukrainë për zgjidhjen e krizës në Donbas, deklaroi se ata i kanë dhënë delegacionit rus një listë prej 11 personash për të kryer shkëmbimin e të burgosurve deri në fund të vitit.
Në një intervistë me Hromadske, Kravçuk deklaroi se presin listën e palës kundërshtare, të separatistëve pro-rusë.
Kravçuk vuri në dukje se qëllimi i tyre është të sigurojnë lirimin e të gjithë të burgosurve.
Shkëmbimi i fundit i të burgosurve midis Ukrainës dhe separatistëve pro-rusë u krye në muajin prill.
Konfliktet kanë vazhduar që nga viti 2014 midis Kievit dhe separatistëve pro-rusë, të cilët shpallën të ashtuquajturën pavarësi të tyre në rajonin e Donbasit.
